Denmark-in goal an sur tir

Group F lamah Denmark-in goal an sur tir a, an mikhual Moldova chu 8-0 ngawtin an sawp - Denmark tan rawlthar duhawm Mikkel Damsgaard leh Kasper Dolberg-ten goal hnih ve ve an khung.

Kum 20 mi Damsgaard hi Serie A club Sampdoria tan a khel mek a, Denmark tana match hnih a khelhnaah goal hnih a khung - he player hi chhinchhiah bik a sual lo ang.

Denmark goal hmasa ber khunga, goal hnih khungtu ve bawk Dolberg hi kum 23 lek a ni a, French club Nice tan a khel mek. Ram tan match 23-a khelhah goal sarih a khung der tawh.

Udinese defender Jens Stryger Larsen, Brentford midfielder Mathias Jensen, Hoffenheim forward Robert Skov leh Union Berlin forward Marcus Ingvartsen-te chuan Denmark tan goal khat ṭheuh an khung bawk.

Denmark hian World Cup 2022 thleng tur Qatar-a mihring dikna chanvo rahbeh duh lohna lantir nan "Football Supports Change" tih chuanna T-shirt inkhelh hmain an ha a, major tournament qualifier-a an chak chian ber record an siam zui.

Israel laka 2-0 a lo chak tawh Denmark-in match hnih aṭangin point ruk an nei a, an elpui ber tura ngaih Austria chuan 3-1 in Faroe Islands an hneh ve bawk.

Faroe Islands tan Sonni Ragnar Nattestad chuan rin loh takin goal hmahruai a khung a, Austria-in Aleksandar Dragovic, Christoph Baumgartner leh Sasa Kalajdzic hmanga chhangletin hnehna an chang.

Israel leh Scotland chu 1-1 in an inhnehtawk a, mualneitu Israel tan Dor Peretz chuan kawh zetin goal hmahruai khung mah se Scotland-in Ryan Fraser hmangin an chhanglet a, goal dang a luh loh avangin team pahnih hi point khat ve vea an lungawi a ṭul.

Group F Results

Denmark 8 - 0 Moldova

DEN: Kasper Dolberg 19' (P), 48'; Mikkel Damsgaard 21', 29'; Jens Stryger Larsen 35'; Mathias Jensen 38'; Robert Skov 81'; Marcus Ingvartsen 89'

Austria 3 - 1 Faroe Islands

AUS: Aleksandar Dragovic 30'; Christoph Baumgartner 37'; Sasa Kalajdzic 44'

FAR: Sonni Ragnar Nattestad 19'

Israel 1-1 Scotland

ISR: Dor Peretz 44'

SCO: Ryan Fraser 56'