Last 16-ah Medvedev a lut

Miami Open khelh laiah champion tura rinkai Daniil Medvedev chuan nimin khan last 16 a inhlangkai. Russian tlangval hian a khingpui Australian Alexei Popyrin chu harsa takin 7-6 (7/3), 6-7 (7/9), 6-4 in a hneh hram.

Nimin khan Florida chhim lamah khua a lum viau a, ram vawta awm ṭhang Medvedev pawh a chau tih a hriat. Set hmasa pahnihah tie break an khel ve ve a, an inkhel tawk takzet - set hnuhnung berah erawh player ṭha zawk a nihna a lang.

World number 2 Medvedev chuan, "Tennis ka khelh hun chhunga hnehna ka chan hlu ber zinga mi a ni ang, a nihna takah chuan set thumna kan khelh meuh kha chuan ka chau tawh, harsa takin hnehna ka chang hram," tiin a sawi.

Australian Open finalist Medvedev hian a match lehpekah chuan Frances Tiafoe a hmachhawn ang, ani hian Serbian tlangval seeded 16-na Dusan Lajovic chu 1-6, 7-5, 6-3 in a lo hneh ve bawk.

Inkhel dangah 2018 Miami Open champion John Isner pawhin hnehna a chang, American star service nei ṭha tak hian seeded 11-na Felix Auger-Aliassime chu 7-6 (7/5), 7-6 (7/5) in a hneh; last 16-ah Roberto Bautista Agut nen an inhmachhawn leh ang.