England an chak leh ta

World Cup 2022 qualifier-a an match hnihnaah England an chak leh ta a, Albania chu an mikhualna ramah 2-0 in an hneh - Harry Kane leh Mason Mount-ten goal khat ve ve an khung.

Three Lions hian an match hmasa berah San Marino chu 5-0 in an sawp tawh bawk a, match hnih an khelh aṭanga point ruk neiin group I-ah hmahruaitu an ni mek.

Nilaini zan dar 12:15-ah England hian an group-a an elpui ber tura ngaih Poland an hmachhawn zui dawn a, Wembley-a an inkhel tur hi a nghahhlelhawm hle.

Poland hian Pathianni zan khan group I inkhel dangah Andorra chu 3-0 in an sawp a, Robert Lewandowski chuan goal hnih khungin Karol Swiderski chuan goal khat a khung ve bawk.

Kane bawk chu

Tottenham Hotspur striker Kane-a'n club tan goal khung a chawlhsan loh laiin ram tana goal-a khung lohna erawh a rei tawh hle - November 2019 khan Euro 2020 qualifier-ah Kosovo lakah a khung.

Mahse, hemi hnu hian English striker hian ram tan a khung leh tawh lo. Ni 500 zet a liam hman a, minute 496 zet chu England tan goal-a khung lo - mahse, Albania lakah a thiam a la theihnghilh lo tih a pholang a, Luke Shaw-a ball cross chu ṭha zetin a tauh lut.

Kane-a'n minute 38-naa ram tana a goal 33-na a khung hma hian Three Lions an hlauhawm tawk lo a, an khel a hmuhnawm lo. Mahse, Kane-a goal khung hnuah an game-a nung sawt a, an hmuhnawm.

Minute 63-naah Mason Mount chuan amah ringhleltute chhangletin an goal hnihna a khung ve leh a, English midfielder hi Frank Lampard-a duhsakna avanga inkhel tam anga sawi ni ṭhin mah se Thomas Tuchel leh Gareth Southgate-te pawhin an rin ngam miau avangin a thiamna sawi nep theih a ni lo.

Southgate & England

Gareth Southgate-a'n 3-4-2-1 formation a hman ṭhin aṭangin 4-3-3 formation a hmang a, World Cup qualifier match hnih a khelhpui tawhah chuan a la hlawhtlinpui.

Hetihrual hian an hmachhawn team hi San Marino leh Albania an ni tih hriat tel a ṭha a, Poland an hmachhawn hunah Southgate-a formation a ṭhat tak tak leh tak tak loh a hriat ang.

Southgate hian midfield-ah tlarhnung venpui nuam ti zawk Declan Rice leh Kalvin Phillips a luh rual tir a, tuna an khelh dan en chuan he formation hi Euro-ah pawh an hman mai a rinawm.

Chutihrual chuan Liverpool captain Jordan Henderson dam hman leh hman loh hi England tan a pawimawh ang - Hendo hi a dam hman a nih chuan Rice nen midfield-ah an inkawp ṭhin ang.

Poland an harh

Tunlaia striker 'hot' ber pawl Robert Lewandowski an kawl chungin Poland-in an match hmasa berah hnehna an chang zo lo a, team 'vantlang' Hungary chu 3-3 in an inhnehtawkpui hram.

Pathianni zanah erawh England thawnthu a danglam ta a, an mikhual Andorra chu 3-0 ngawtin an sawp. Minute 30-na lekah Lewandowski chuan Maciej Rybus freekick aṭanga ball kal chu a volley goal a, minute 55-naah Kamil Jozwiak-a siamsak chu hnai set sawt aṭangin a khung bawk.

Kum 32 mi Lewandowski hian tun season-ah ram leh club tan match 47 khelin goal 42-a khung tawh a, a match hnuhnung 10-ah goal 16-a khung - tun season-ah Bayern tan inelna hrang hrangah match 36 khelin goal 42-a khung a, assist vawi riat a nei.

Bayern striker Lewy hi Karol Swiderski chuan minute 63-naah a thlak a, Super League Greece club PAOK striker hian hun tawp nan minute hnih a la awm tihah chak nemnghehna goal-a khung.