Chanmarians Academy an hawng

Cricket Association of Mizoram (CAM) hnuaia awm Chanmarians Cricket Club (CCC) chuan Academy an hawng thar. CAM president Robert Lalfamkima chuan kum naupang zawkten cricket an zirna tur hmun hi nimin zing khan Chanmari Mini Sports Complex-ah a hawng.

Chanmarians hian Academy hi Under 14 tan an buatsaih a ni a, hawn ni hian player 57 an inziak lut nghal. CAM joint secretary Joseph Lalhriatpuia'n CCC Academy jersey a tlangzarh nghal, CCC president LV Lalthantluanga chuan academy rintlak leh changtlung tak an din thei chu lawmawm a tih thu a sawi.

CAM hnuaiah hian club hrang hrangin academy an hawng zel. Chanmarians hma hian - Ramhlun Venglai, Armed Veng, Govt. Complex, Zemabawk, Durtlang, Bawngkawn South, Gladiators, Tlangnuam, Hunthar Veng leh Luangmual te chuan academy hi an lo nei tawh.