Hamilton bawk a chungnung

Formula 1 season an ṭan a, nikum ang bawkin thawnthu dang a la awm thei chuang lo - a tlan chak ber chu Lewis Hamilton bawk a la ni. Mercedes driver hnungah hian nikuma a elpui Max Verstappen a thleng, driver pahnih hi kum tluanin an inel chhoh a rinawm.

Pathianni zan Bahrain Grand Prix-ah Hamilton leh Verstappen an in um na hle. Lap li chauh tlan hmabak an neih laiin Red Bull driver zawkin hma a hruai, mahse tlan kawng sir a hrut zauh karah Hamilton rawn dawk chhuakin hnehna a chang zui.

Champion lai Hamilton chuan, "Intlansiak harsa leh nuam tak a va ni chiang ve. Qualifying aṭanga inelna tawp kan neih thlengin Max khan min thlah fal miah lo, tihsual zeuh pawh nei ni ila ka tan hnehna chan ngaihna a awm lo ang," a ti a, inelna hautak a tih thu a sawi bawk.

Season hmasa khan Hamilton hian a vawi sarih nan F1 title a la, kuminah hian a champion leh a nih chuan Michael Schumacher (7 titles) a khum dawn. Champion hnem ber nih a tumna kawngah bul a ṭan fuh hle.

Red Bull car khalhtu Verstappen chuan, "Thawnthu a la danglam lo, a la pangngai reng. Mahse season hmasa kan inelna ai chuan kan inhnaih zawk, pakhatna dinhmun luah chiah lo mah ila kan point hmuh zat hi a lawmawm," tiin a sawi.

Schumacher-a fapa, a vawi khat nana F1 season bul ṭantu Mick Schumacher-a'n beisei a phak lo. Haas driver hi 18-naah a thleng a, intlansiak tlan tluan zingah a hnuhnung ber. Fernando Alonso leh Nikita Mazepin te chu an tlan tluan ve thei lo.

Aston Martin zawmtu Sebastian Vettel pawh beisei angin a tlan ṭha tawk lo, 14-naah a thleng. World champion vawi li ni tawh hian Ferrari tana a contract a hmang zo a, an pawh sei loh avangin team dang a zawm a ni.

F1 season kal laiah hian intlansiak vawi 23 neih tum a ni a, a pahnihna atan April 18 hian Emilia Romagna GP an tlan leh ang.