Tottenham Stadium thar hawnna a ropui

Tottenham Hotspur Stadium chu an peih hun tura beisei aṭanga thla ruk hnuah chauh hman theih ni mah se a hawn zan a nep chuang lo a, stadium mawina leh halmawi hal te chu lang theia ropui a ni a, Spurs ṭantute mittui chuan thil thlen dan a sawifiah thung.

Nilaini zan inkhelah hian South Korea forward Son Heung-min chuan minute 55-naah Crystal Palace lamah khungin minute 80-naah Christian Eriksen-a'n chak nemnghehna a khung. Tottenham Stadium-a goal hmasa ber khungtu Son hi Spurs history-ah a chuang reng tawh ang.

Welcome Home

Tottenham-in stadium sak chhungin Wembley Stadium chu home match khelh nan an hmang. Premier League emaw inelna dang thlirna aṭang chuan Spurs hian an mualah an khel ṭhin a, amaherawhchu thinlung chhungril takin anmahni in angin 'Wembley Stadium' hi an thlir thei lo a, an khingpuite aiin an supporter an tam zawk tih loh chu a danglam tam lo hle.

Ni 689 an nghah hnuah an nghak chhuak ta a, an thupui chu 'Welcome Home' a ni a. Crystal Palace nena an inkhelh hun hma fe aṭangin Spurs ṭantute stadium chhehvelah an awm ṭan tawh a, England-ah chuan 'rial leh vur' hi an ram chanchina pawimawh tak a ni a, stadium hawn hma darkar khat velah an duan sa ni chuang loin chutiang zawng zawng chu a rawn thleng.

Entu 59,215 zingah a ruhkawl an la awm leh a, South Stand lama awm mi 17,500 chuan a hawnna neih lai aṭangin thawm an nei ring tawh. Gladesmore Community School choir chuan 'Everybody Dreams' tih chu an rawn sa a, he hla hi kum 2011-a Tottenham thil thleng duhawm loh intualvuaknaa ṭhalai te beiseina siamtu atana phuah a nih avangin London-a chengte tan chuan a hlu hle.

Chutah "Glory, Glory Tottenham Hotspur" chu Spurs ṭantu Wynne Evans leh Gladesmore student hlui Lanya Matthews ten mipui chawk tho thei tur khawpa mawiin an sa a, halmawi halin a chhunzawm nghal.

Spurs fapa Son

Tottenham Hotspur-in Asian zinga tun hnaia che ṭha ber Son Heung-min an neih avangin stadium sak vanga player an lak belh theih loh lai pawhin champion beiseina hun rei tak an neih theih phah a, Champions League khel lo thei dinhmuna an din lai pawhin Son tho hi mamawh chhanna chu a ni.

First half-a goal a luh loh hnuin Son hian minute 55-naah a khung a, Tottenham Hotspur Stadium-a goal hmasa ber a nih avangin boruak vawt tak chu vawi leh khatah a lum nghal a, a boruak tem ve lo tan thil thlen dan a hriat fiah theih a ni lo ang.

Son-a chuan, "A ropui hi a ni tawp mai. White Hart Lane kha chu chuan hmun pawimawh a chang reng tawh dawn a, tunah chuan stadium thar kan nei a, goal hmasa ber ka khung hi ka awih thei lo. Wembley-ah kha chuan ngaih ngam takin kan awm lo a, tuna mi hi chu a dang a ni. Stadium leh mipui thawm zawng zawng kha ka sawifiah thiam lo," tiin a sawi.

Daniel Levy tan

Spurs boss Mauricio Pochettino chuan, "Hun danglam tak a ni a, zan duhawm tak a ni. Khawvela stadium ṭha ber ni hian ka hria a, ka ring bawk. Daniel Levy hma thlir rah a ni a, kan chak hi a tan kan hlan a ni," tiin club chairman tan a hlan.

Stadium thar hi pound tluklehdingawn khat senga sak a ni a, Pochettino chuan, "Kan stadium thlir chuan World Cup champion ta ni awma ṭha a ni a, chutiang team anga khelh chhuah chu kan tum tur a ni. Tunah chuan bung thar kan kai a, thil lian zawk tum turin kan inpeih a ngai a, kan hmaa inchhawp zawng zawng thlir hian kan tum a sang tur a ni," tiin an stadium chu a chhuang hle.