Mbappe hi goal 1000 khung thei tur a ni - Pele

Football legend Pele chuan tun laia footballer hmuhnawm berte zinga mi Kylian Mbappe a dahsang hle a, tun kar tir lam khan French khawpui Paris-a an inhmuhnaah, "Thil theih a ni," tiin Mbappe chuan a inkhelh hun chhungin goal 1000 a khung theih a rin thu a sawi.

Thawhlehnia Pele leh Mbappe te an inhmuh lai hian France rawlthar duhawm hian goal 103 a khung tawh a, Nilaini zan khan Paris St-Germain tan penalty vawi khat chhuih lut lehin goal 104 a nei ta. PSG hi Nantes lakah 3-0 a chak puiin French Cup final a hruai thleng a, Rennes nen nomawi an inchuh ang.

Goal 1000

'King of Football' tia hming lem an pek Pele chuan Mbappe a hmuh dan sawiin, "Kei khan goal 1025 ka khung a, ani hian goal 1000 chu a khung thei ang, thil theih a ni," tiin a sawi a, France tan match 30 khelh aṭanga goal 12 khungtu a dahsang thiam vet vet hle.

PSG forward Mbappe hian nikum khan World Cup final-a Croatia 4-2 a an hneh ṭumin goal a khung a, football inelna sang berah hian final bikah kum 20 hnuai lam goal thung thei pahnihna chiah a ni.

Goal 1000 chungchang chhang letin Mbappe chuan, "Khelmual pangngai chhunga mi chauh ni lo, games khelhna leh infiamna hmuna goal zawng zawng nen kan chhiar a nih ngawt loh chuan goal 1000 chu thlen theih ka inring lo.

"Mahse, Pele hnaih thei ang bera awm ka tum dawn a, mahse amah hnaih tur ringawt pawh hian inkhelh a ngai rei hle ang tih chu thil chiang a ni," a ti, legend Pele sulhnu zui zawh a inring lo. Tun season bikah Mbappe-a'n PSG tan goal 33 a khung tawh, heng zinga goal 27 chu league match vawi 24 a khelh aṭanga a khung a ni.

Khaikhinna

Player ṭha pahnih chu khaikhin an ni tawh ṭhin a, Mbappe pawh mi tam tak chuan Pele nena lo khaikhin tawk an awm. Tun dinhmunah Mbappe hi kum 20 mi a ni mek a, ani ang rual a nih chuan Brazil international hlui hi World Champion vawi hnih a ni tawh.

AS Monaco aṭanga rawn lar chhuak Mbappe chuan, "Football lal chu pakhat chiah a awm, kei chu Kylian ka nei reng ang. Ram leh club hi a sang thei ang ber thlenpui ka duh, min khaikhin ṭhin hi chu ka lawm rualin a thlen chin ang hi engtikah mah kan thlen theih ka ring lo," a ti.

Brazil tan match 92 a khelh aṭanga goal 77 khungtu Pele hian 1958, 1962 leh 1970 te khan an ram hi World Cup a chawipui. Mbappe hi kum 19 mi chauh ni chunga world champion team rinrawl ni thei a ni a, hliam nei loa a khel tluang a nih chuan Les Blues hi ropuina dang a chanpui zel a nih pawhin a mak lo ang.

Paris St-Germain duhlai chuan a hmathlir chuangchang sawi zuiin, "Pele khan a inkhelh hun chhungin khawvela ropui ber nih a tum kher lo ang, nuam ti takin football a khel mai a, chu chuan ram leh club tan rahṭha a chhuah thei a ni.

"Kei pawhin PSG leh France tana ṭha taka khelh mai hi ka duhdan a ni, mimal chawimawina hi chu a tlachawpa thleng thei a ni. Team tan ṭha taka kan khel a nih chuan fak pawh kan hlawh ve ṭhin, chawimawina dawn tum ni loin, nuam ti takin football hi infiamna a nih ang taka khelh mai hi ka duhdan a ni," a ti.

Ram dangah

Pele khan a hun tam zawk chu an ram club Santos tan a hmang a, a hun tawp lamah erawh American club New York Cosmos tan season hnih chhung a khel thung. Europe-ah inkhel lo mah se a ropuina sawi nep theih a ni lo, khawvel chuan a thiam tih a pawm nghet thlat tho a ni.

Tun hnaiah Mbappe pawh PSG aṭangin chhuak se, European club lian tan khel ve rawh se, an ti ṭhin. Club sawn chungchang sawiin Pele chuan, "Mi tam tak chuan goal leh nomawi hi a pawimawh ber niin an sawi ṭhin. Goal tam tak ka khung avang khan Pathiam chungah pawh ka lawm hle.

"Amaherawhchu, football-ah chuan pawimawh ber tia sawi theih a awm bik lo, goal hi mahni chauha khung ngawt theih a nih loh avangin thawhhona ṭha a pawimawh, midang chunga leng tur chuan ṭhiante thlawpna dawn ṭhat a pawimawh em em a ni," tiin a sawi.

Mbappe khelhna PSG hian Ligue 1 nomawi chu an chawi dawn tih a chiang thawkhat tawh a, French Cup pawh final an lut tawh. Mahse, an duh ber Champions League-ah Manchester United an ngam loh avangin last 16-ah an zingkawng a tawp - tun season chhung chuan an duh leh tum ang nomawi an chawi kim dawn rih lo.