German coach ṭha ber Florian Kohfeldt

German Football Association (DFB) chuan 2018 chhunga an coach ṭha ber an thlang chhuak a, a hming chu Florian Kohfeldt a ni. Chawimawina hi 2009 aṭanga sem ṭan niin Werder Bremen coach hi a dawng thei coach 10-na chiah a ni.

Season hmasa khan Werder Bremen hi an talbuai hle a, German football inelna sang ber Bundesliga aṭanga tla thei dinhmunah an ding hman. Mahse, Kohfeldt an lakluh chinah chanchin a danglam, match riat an khelh zinga parukah hnehna changin 11-na ni chungin season an khar.

Kum 36 mi Kohfeldt chuan, "Hetiang chawimawina dawn chu ka tan chuan a hlu lutuk, keimah chauha thawhchhuah ni loin coaching staff ka neih ṭhat vang a nih bakah team pumpui hnathawh a ni," tiin a sawi.

Tun season-ah pawh Bremen hi an che fuh chhunzawm, match 27 khelh tawh chinah point 42 hmuin parukna an ni mek. Pathianni zan dar 9:30 hian Borussia Monchengladbach nen an inkhel leh ang.