Bayern damna Lewandowski

Nilaini zan German Cup quarterfinal inkhelah Bayern Munich chu tla thei dinhmunah an ding hman a, striker Robert Lewandowski chuan German champion hi Heidenheim lakah chhandamin 5-4 in hnehna a chanpui.

Allianz Arena-a inkhelah Bayern lamin minute 12-naah Leon Goretzka hmangin goal hmahruai an khung, Niko Kovac-a naute hi mahni muala khel an nih bawk avangin second division club lakah nuamsa taka chak tura ngaih an ni nghal.

Mahse, goal luh aṭanga minute khat hnu lekah defender Niklas Sule hnawhchhuah niin hei hian inkhel thawnthu a thlak danglam chiang hle. Heidenheim lamin Paul Glatzel hmanga si phurh an sut hnuah Marc Schnatterer chuan an hmahruaina goal khungin chawlhlawk laiin 2-1 in hma an hruai let.

Amaherawhchu, second division club lakah Bayern an tlawm lo - Thomas Muller chuan an siphurh a sut bakah Robert Lewandowski-a'n goal hnih khungin Serge Gnabry chuan an goal ngana a khung bawk. Mikhual lamin Glatzel hmanga goal hnih an neih belh chuan awmzia a nei phak tawh lo.

German chhim lama awm Heidenheim hi kum li liam ta kha chuan fourth division an ni a, nasa taka hmasawnin tunah hian German football inelna sang ber dawtah parukna dinhmun luahtu an ni thei, German champion Bayern lakah goal li khung hi an tan chanchin ropui a tling.

Croatian manager Kovac kaihhruaina hnuaiah Bayern hian season an hmang ṭha lo, Champions League aṭangin Liverpool hneh loin an tla tawh. Bundesliga nomawi an kawl lai pawh chan mai thei dinhmunah an ding mek, Pathianni zan hian an mahni aia point hniha sang leh hmahruaitu ni bawk Borussia Dortmund nen an intawng dawn.

Heidenheim coach Frank Schmidt chuan, "Kan tan chuan duh leh beisei ang result ni lo mah se inkhel nuam leh hlimawm tak a ni," tiin a sawi. Bayern coach Kovac pawhin inkhel hlimawm a nih thu leh, an tan a awlsam bik loh thu a sawi ve bawk.

Nilaini zan quarterfinal inkhel dangah Milot Rashica leh Davy Klaassen te goal hmangin Werder Bremen chuan Schalke 2-0 a hnehin semifinal an inhlangkai ve bawk.