Empoli lakah Napoli an tlawm

Carlo Ancelotti enkawl Napoli tan Serie A nomawi beiseina bo vek lo mah se a tlem tawh hle. Nilaini zan khan Napoli hi table mawng lama talbuai mek Empoli lakah 2-1 in an tlawm.

Empoli tan Diego Farias-a goal khung chu Piotr Zielinski-a'n yard 30-a hla aṭangin sut mah se, Giovanni di Lorenzo chuan second half-ah chakna goal a khung leh a, point 28 hmuin relegation zone an chhuahsan nghal a ni.

Tun kar tawp hian champion lai Juventus-in AC Milan an hneh a, inkhel dangah Napoli hi Genoa lakah an tlawm a nih chuan a zawna a season riat nan Turin club hi Italian champion an ni thei der dawn.

Inkhel dangah Inter Milan tan Mauro Icardi a inlan leh thei tawh, captain nihna an hlih sak Icardi hi February thla hnua a inkhelh lehna hmasa ber a ni a, penalty aṭanga goal khat khungin a club hi Genoa lakah 4-0 in hnehna a chanpui - point 56 hmuin pathumnaah an inhlangkai.

Champions League khelh tum AS Roma beiseina a thamral mek zel, Claudio Ranieri naute hi an match hnuhnung pahniha an tlawm hnuah Fiorentina nen 2-2 in an inhnehtawk. Lazio pawh SPAL lakah 1-0 in an tlawm ve bawk.