A chung berah City an awm leh ta

Premier League hmahruaitu chu Manchester City an ni leh ta. Zanin dar 12:30-ah Southampton khelmualah Liverpool an lenglut dawn a, result a zirin hmahruaitu hi danglam lehnghal thei a ni bawk!

Manchester City hian Nilaini zan khan an mikhual Cardiff City chu harsatna nei loin 2-0 in an hneh a, khelh zat inangah Liverpool chu point khata tlan pelin hmahruaitu an ni. City tan Kevin de Bruyne leh Leroy Sane ten goal khat ve ve an khung a, Cardiff City-in a chhanletna tur an nei lo - tlak lam an hnaih zel.

Pep Guardiola enkawl team hian Inrinni-ah FA Cup semifinal an khel lehnghal dawn a, Liverpool erawh zanin inkhelh zawhah chuan Thawhlehni zana Champions League khel turin an inpuahchah nghal thei ang.

A harsa lo

Inkhelh hma aṭangin Cardiff City manager Neil Warnock thusawi a dawih aw a, City lakah hnehna chan a tum ngam lo niin a lang - inkhel ṭantir aṭangin City-in an nawr nghal.

Minute rukna lekah Kevin de Bruyne chuan City tan goal hmahruai a khung nghal a, December 22 hnua Premier League-a a goal khung hmasak ber hi Aymeric Laporte siamsak aṭanga a kila a pet luh a ni.

City-in inkhel an thunun chhunzawm a, chance an hlah mawlh mawlh a ni ber - chawlhlawk hman nan minute khat chauh a awm tawh tihah erawh an hun ṭha neih an khawhral tawh lo.

Riyad Mahrez ball cross chu Gabriel Jesus-a'n a awm hmangin Sane ke zawnah tak a tauh phei a, Sane hian harsatna nei loin goal-ah a lo chantir - 2-0 in an chak.

Aiawhtu tling

Manchester City boss Pep Guardiola-a'n Inrinni zanah FA Cup semifinal khelh lehnghal a ṭul tih hriain squad a siksawi a, inhliam vanga Sergio Aguero a inlan theih loh laiin Raheem Sterling chu bench-ah dah a ni bawk.

Tun hnaia inkhel bul ṭan khat Jesus-a'n a hun neih ṭhatah goal khung lo mah se a ṭhiante tana hmun awl siamsaktu a ni a, a tlan tam a, Cardiff tlarhnung tan vawi tam hna a siam. Riyad Mahrez hming lam hmaih a thiang lo a, Leicester City forward hlui hi second half-ah penalty pek a ni lo chu a vanduai. Rawlthar duhawm Phil Foden hmabak en zia kan hmu zel a, Cardiff keeper Neil Etheridge tan hna hautak a siamsak bakah post a pet per bawk.

City tana chanchin lawmawm lo erawh hliam vanga Oleksandr Zinchenko lakchhuah a ngai kha a ni a, he thu buatsaih lai hian a dinhmun kan hre hman lo.

A harsa dawn

City-in Premier League-ah match ruk chiah an khel tawh dawn a, Liverpool nen khelh tur zat an la neih a in ang - City tana thil chiang anga sawi theih chu April hi an paltlang phawt chuan champion anga sawi theih an ni ang.

Mahse, April paltlang tak hi City tana harsa tur chu a ni - kar khatah inelna hrang hrang nen match hnih zel an nei tawh dawn a, City ang squad chhah tak tan pawh a harsa dawn tih hai rual a ni lo. Hei mai a ni lo - an match hmabak zingah Brighton (FA Cup semifinal) leh Tottenham Hotspur (Champions League quarterfinal) an awm a, inelna a san tawh avangin a harsa dawn.

Premier League-ah Champions League khelh phak tum Tottenham leh Manchester United chu a zawnin an hmachhawn leh dawn bawk a, he inkhel pahnih pawh hi City champion leh champion loh hril thei tu tur a ni.

Liverpool hi?

Fixture hmabak an neih aṭanga thlir chuan City aiin Liverpool chu dinhmun ṭha zawk an ni - club lian zingah Chelsea chiah hmachhawn tur an nei tawh.

Mahse, league match hnuhnung 10 kan thlir chuan City vawi khat an tlawm laiin Reds hi tlawm lo mah se vawi li an khingpui an inhnehtawkpui a, point an hlohna club pali zingah United chiah club lian tia chhiar theih an awm. Premier League inum boruak a san tak em avangin squad chhah lo Liverpool tan chuan Cup competition lama an inlan tawh lo tur hi malsawmna a ni thei a, Champions League-ah an vannei lehzel bawk.

City-in anmahni hrechiangtu leh team ṭha Spurs an hmachhawn dawn laiin season hmasaa an lo sawp tawh Porto chu quarterfinal-a an hmachhawn tur a ni. Tun dinhmunah chuan vanneihna pawh Liverpool lam ṭang a ni rih a, enge an an zel dawn tih chu zanina Saints an lenchilh hunah hrilh kan ni ang.