Barca khelmualah beisei nei Atletico

Zanin dar 12:15-ah Atletico Madrid-in Barcelona an lenchilh dawn a, hnehna an chang thei a nih chuan an beisei bo tawh hnu a nung thar leh ang. Barca hi hun rei tak chu cham­­pion chiang tawh ang hiala ngaih an ni a, mahse an match hnu­hnung berah Villarreal nen an in­hnehtawk leh avangin Atletico tan beisei a sang sawt.

Zaninah Atletico hian hnehna an chang a nih chuan Barca nena an inthlauhna hi point nga chauh a ni tawh dawn a, thih tha nen an bei ang. Atletico hian La Liga tih loh bei­sei tur an nei tawh lo a, Barca erawh treble champion in beisei an ni thung - inkhel a hmuhnawm dawn.

A hautak

Barcelona hian Nilaini zan dar 12:30-ah Champions League quar­terfinal first leg an khel lehnghal dawn a, khualmualah Manchester United an lenchilh ang.

Catalan club tana fixture hautak zia ngaihtuah chuan zanina an inrem dan tur hriatthiam a harsa a, Atletico an chak chuan La Liga-a an dinhmun a derthawn theih bawk si avangin Ernesto Valverde-a'n risk a lak ngam loh zawk a rinawm mah. Villarreal laka bench-a dah Lionel Messi chu inkhel bul ṭan tawh tura beisei a ni a, tun season-a goal 42 khung tawh forward hi Atletico tan dan a chakawm lo ang.

Ousmane Dembele chuan trai­ning zawm leh tawh mah se a inlan a la beiseiawm lo a, Villarreal laka assist leh goal neitu Malcom chu inkhel bul ṭan tura beisei a ni bawk.

A tawp thlengin

Atletico-in Barca hmachhawn hmaa hriat atana thu hriat duhawm lo ber an hria a, tlarhmaah a player chhuanvawr Diego Costa leh Alvaro Morata a la chhawr thei dawn lo.

Striker pahnih an awm loh chuan Atletico hian Antoine Griezmann leh Nikola Kalinic chiah tlarhmaa chhawr tur an nei dawn tihna a ni a, Barca tlarhnung ṭhiah a harsa dawn. Hei mai hi a la ni lo cheu - Thomas Lemar chu a inlan theih a la beiseiawm lo a, nipui transfer-a Bayern Munich pan tur Theo Her­nandez a la dam chiang lo bawk.

Mahse, Atletico boss Diego Simeone hian, "La Liga nomawi beisei hian kan thawk tawp thlengin kan bei ang," tiin a lo sawi tawh a, Barca lakah a zam lo ang.