India tan Siami'n goal a khung

Mizo nula Lalremsiami Hmar chuan India hmeichhe hockey team tan goal a khung leh ta. Siami telna India hi Malaysia-ah tour neiin an kal mek a, an match hmasa berah 3-0 in hnehna an chang.

Kuala Lumpur, Malaysia-a inkhelah India tan striker Vandana Katariya chuan goal hnih a khung bakah Siami'n an goal thumna a khung, tun ṭumah hian India captain Rani Rampal chu awltir a nih avangin goal khung kawngah Siami chungah mawhphurhna a sang zual.

Kolasib nula Siami hi tun hnaiah India tan koh zingah a tel ziah, 2017 khan Asian Cup-ah a champion tawh a, Commonwealth Games-ah squad player zinga a naupang ber ni chunga a inlan bakah - Youth Olympic Games khan India tan silver medal a lo vaw chhuak tawh bawk.

India hian kumtir lam khan intuaihriam turin Spain-ah tour an nei tawh bawk, tun ṭumah hian match nga an khel leh dawn a, vawiin tlai dar 3:30 hian an match hnihna an khel leh dawn a ni.