Srikanth leh Sindhu an tla

Malaysia Open khelh mekah PV Sindhu keh Kidambi Srikanth te chuan an tum ram an thleng zo lo. Ningani khan seond round khelin India nula hi Sung Ji Hyun lakah a chak lo a, mipa singles player Kidambi Srikanth pawh nimin tlai quarterfinal-ah Chen Long hneh loin a zinkawng a tawp ve bawk.

Rio Olympic silver medalist Sindhu hi Hyun nen minute 43 an inkhelh hnuah 18-21, 7-21 in a chak lo. A chak loh hnuah Sindhu chuan, "Tihsual ka ngah em em a, ka khingpui khelh ṭhat chu thuhran ni se keimah tihsual vangin point ka hloh hnem.

"Badminton court chhungah hun ka hman tam lehzual a ngai, ka taksa dinhmun a ṭha a, a rang thei ang berin ṭha taka khelh chhuah leh ka tum dawn a ni," tiin thawhrim zual a tum thu a sawi.

Mipa singles player Srikanth chuan last 16-ah minute 32 chhung lekin Thailand player Khosit Phetpradab chu 21-11, 21-15 a hnehin a thiam pariat zingah a lut. Mahse, India tlangval hian nimin tlai khan Long a hmachhawn leh a, world number 3 hlui Srikanth hi 18-21 19-21 in a chak lo.

Tun hnaia badminton khawvel luah hnehtu world number 1 Kento Momota chuan beisei ang result a nei lo. Japanese shuttler hi 20-22, 15-21 in Indonesia tlangval Jonatan Christie lakah a tlawm. Christie hian India Open champion Viktor Axelsen a hmachhawn leh ang.