Man City leh Aguero inṭhen dawn

Sergio Aguero chuan tun season tawp rualin Manchester City a chhuahsan dawn. Argentine striker hian City tana a contract neih lai chu a hmang zo dawn a, an pawhsei loh avangin a chhuah tur thu hi club chuan an ti chiang.

Man City tan match 384 a khelh aṭanga goal 257 khungtu, club tana goal khung hnem ber hi Etihad Stadium tualah a lim (statue) siam a ni dawn - Vincent Kompany leh David Silva te nen huang khatah an awm dawn.

City defender ropui ni ṭhin Kompany leh midfielder ball thiam Silva te hi stadium bulah an lim siam a ni a, player tan chuan chawimawina sang leh ropui tak a ni; player nazawng tana hlawh chhuah phak loh a ni.

Mangṭha Aguero
A vanglai a liam ve ta, kum 32 mi a nih tawh bakah hliam leh harsatna dang ten a tlak buak ve reng a, season kal laiah club tan inelna hrang hrangah match 14 chauh a la khel - heng zingah hian vawi kua chu bul ṭanin, goal thum a khung.

Club tan chelh reng kha thil fin thlak ber a ni tawh bik lo, boruak ṭha tak hnuaia inṭhen mai kha an tih awm tak ni pawhin a lang. City chairman Khaldoon Al Mubarak chuan, "Sergio-a'n tun hnai kum 10 chhunga Manchetser City tan a thil tih hi engmahin a tluk phak lo.

"A sulhnu ropui hi club hmangaihtu zawng zawng chuan an hre reng tawh dawn. Man City fans mai bakah football hmangaihtu chuan Aguero hi chu an ngaina ang," tiin an striker chhuak tur chu a dah sang hle.

City legend
Manchester khawpuiah Manchester United an lian a, Man City hi chu el thamah an ngai vak lem lo. Mahse, Arab sum an hman theih chinah player ṭha an lalut a, team an indin thar - Aguero pawh hi Atletico Madrid aṭanga an lakluh a ni.

Premier League 2012 season a zawh dawn khan, match hnuhnung berah Aguero hian QPR nen an inkhelh ṭumin hun pek belhah goal a khung a, an champion zui. Kum 44 hnua a vawi khat nan league nomawi an chawi, a hnu lam chu history in a zui ta zel.

City tan hian Premier League nomawi pali, FA Cup pakhat leh League Cup panga ngawt a chawi belh. A sulhnu hnutchhiah tawh avang ringawt pawh hian 'Man City Legend' a ni chiang tawh a, kuminah hian nomawi dang pali lak beiseina an la nei bawk.

Khawiah nge?
Aguero khelhpui ṭhin, 2011-12 season EPL champion a nihpui Micah Richards chuan, "Kylian Mbappe, Erling Braut Haaland emaw Harry Kane an nih loh chuan tu nge a hmun ruak luah thei ang, anni ang hi an lei a nih si loh chuan kum khat dang tal la chelh awm," tiin Aguero chungchang a sawi.

Club tam takin an hnehna khel turin an duh dawn tih chu a chiang a, chutih rualin a hlawh a tam avangin a duh na zawng tan lak theih a ni ngawt lo a, amahin khelh duhna hmun a nei bawk ang - tun dinhmunah chuan Barcelona nen an sawi zawm mek.

Argentina international hian an rama inkhelh a duh thu a sawi tawh, chumi hma chuan Barca bakah hian Juventus leh Inter Milan ten an beisei nia sawi a ni a, a chawr chhuahna hmuna a kir hmain European club ṭha chu a zawm leh phawt a rinawm.

Hunin tawpna ni a rawn herchhuahpui meuh chuan, thin ṭhawngtu tam tak a lo awm ṭhin.
Manchetser City tana season 10 chhung ka hun hmanah khan ka lungawiin, tun ang hun leh kumah pawh ka ngaihtuah let pawh hian a chhuanawm viauin ka hria.
Kum 10 hun ka hman chhungin hlawhtlinna tam tak kan changho a, club tana goal khung hnem ber dinhmun pawh ka chelh ve hial. Club hmangaihtute nen pumkhat kan ni a, ka hriatreng tawh turte an ni bawk.
Man City hi a indinthar leh a, chu mi lai kum 2011 khan ka rawn zawm. Club neitu leh ṭhahnem ngai taka he club tana thawktute nen hian khawvela team ṭha leh duhawm zingah kan in hlangkai.
Club ropuina leh hlutna hi midang kutah a innghat chho zel dawn. Kei pawhin tun season tawp thleng hun ka la neih hi a ṭha thei ang bera hman ka tum dawn a, fans tan nomawi leh hlimna nasa tak thlen ka la duh.
Chona thar ka hmachhawn dawn a, chumi atan chuan ka inpeih tawh. Chhuak dawn mah ila ka hun la neihah hian ka theihna sang ber chu ka hlan chhunzawm zel ang.