Azarenka hnehin Barty a tlang

Ashleigh Barty chuan Victoria Azarenka hnehin Miami Open quarterfinal a lut a, inkhel dangah Naomi Osaka chuan harsatna nei loin a thiam zual pariat zingah a hming a chhu kai ve bawk.

World number 1 Barty hian 2020 US Open finalist lakah hian 6-1, 1-6, 6-2 in hnehna a chang a, hrileng vangin hun rei tak an ram Australia pawn lamah inkhel mumal thei lo mah se a inkhelh leh chinah a khel ṭha thei hle.

Miami Open champion lai hian a match lehpekah chuan seeded pasarihna Aryna Sabalenka a hmachhawn leh ang. Belarus nula hian inkhel dangah Marketa Vondrousova chu 6-1, 6-2 in a lo hneh ve thung.

Australian star Barty chuan, "Player ṭha kan hmachhawn a nih chuan rilruah thil dang a awm thiang lo, tun ṭumah pawh khan ka hnufuah zeuh karah a lo sang fal hman hle. Set hnuhnung berah ka vannei zawk ta hram a ni," tiin a a sawi.

Inkhel dangah Osaka chuan Elise Mertens lakah 6-3, 6-3 in hnehna a chang a, tun hnaiah a zawnin match 23 chhung chu hneh loh nei loin a kaltluang ta - US Open leh Australian Open a la a, a vawi khat nan Miami Open title a beisei leh mek.

Japanese nula Osaka chuan, "Hetianga chak zawn reng tur hi chuan ka beisei ngam lo, chutih rualin chak loh erawh ka duh lo. Match tinah player hran zel ka hmachhawn avangin rilru thar put zel a ngai," a ti. Jessica Pegula hnehtu Maria Sakkari nen an inkhel leh ang.