Germany khingpui tur North Macedonia

Germany-in World Cup 2022 qualifying match vawi hnih an khelh tawhah Iceland leh Romania an hneh ve ve a, zanin dar 12:15 hian team nem zawk North Macedonia an mikhual dawn. Chutihrualin North Macedonia hi FIFA ranking-ah 65-na daih ni mah se tun hnaia an khelh dan thlirin dah hniam chi an ni lo.

Macedonia chu...
Germany-in Iceland 3-0 in an hneh a, Romania 1-0 chauhin an hneh leh bawk. Joachim Low chuan, "Romania hi Iceland aiin team ṭha daih an ni tih kan hria," tiin a sawi. Romania hian North Macedonia hi 3-2 chauhin an hneh a, team khelh har tak an ni tih a lang.

Hei chauh hi a ni lo, North Macedonia an match hnuhnung berah Liechtenstein chu 5-0 zetin an sawp a, an player-te zingah Europe club liana tawnhriat nei ṭha an awm nual bawk.

Nations League an khelh ṭhat avangin European Championship-ah pawh an inlan dawn a, Yugoslavia aṭanga an indan hnua inelna lian hmachhawn hmasak ber tur a ni.

Team captain Goran Pandev hi Genoa tan a khel mek a, Lazio legend tiha sawi theih tur khawpin Rome club tan a khel rei a, Napoli leh Inter Milan tan khel tawh bawk.

Liechtenstein an khelh ṭuma goal hnih khungtu Aleksandar Trajkovski hi kum 28 mi a ni a, Spanish club Mallorca tan goal khung harsat deuh mah se ram tan goal 18 zet a khung tawh. Defender Ezgjan Alioski hi Leeds United tana a khelh avangin Mizo nawlpuiin an hre bawk ang.

Low a fimkhur
Joachim Low-a'n Iceland leh Romania a hmachhawn ṭumin player ngai bawk a luhtir a, match thum lai khelh tur a awm chunga inkhel bul ṭantute a siksawi loh avangin a fimkhur hleah a ngaih theih.

Germany tana bul ṭantute chu Manuel Neuer; Emre Can, Matthias Ginter, Antonio Rudiger, Lukas Klostermann; Ilkay Gundogan, Joshua Kimmich, Leon Goretzka; Leroy Sane, Serge Gnabry leh Kai Havertz te a ni.

Inkhel pahnihah bench aṭangin Timo Werner, Amin Younes leh Florian Neuhaus te an lut ve ve a, Iceland an hmachhawn ṭumin rawlthar Jamal Musiala pawh a inlan bawk.

Joachim Low hian Chelsea forward Timo Werner chu bench-ah ṭum hnih a dah tawh a, goal venhim tumte lakah player tlan chak Werner a ring tawk lo tih a hriat theih bawk. Kum 25 mi Werner hian match hnihah kum zat chiah minute a nei a, Thomas Tuchel hnuaiah a la che ṭha lo bawk nen inrintawkna neih a har chho khawp ang.

Chutihrualin Low-a hote hian match hnihah point ruk an hlawh chhuak a, North Macedonia an hneh leh bawk chuan point kua an hmu ang a, World Cup a hnai sawt dawn. Euro C'ship zawhah Low a bang ang a, coach thar tur tan pawh World Cup khel tura Germany hruai thlen a harsa lo ang.