Australia tana captain duh Smith

Steve Smith chuan national selector-ten an duh a nih phawt chuan Australia tana captain leh a duh thu a sawi.

Kum 31 mi Smith chuan, "Thil tam tak ka zir a, thil tam tak ka hriat belh a, tunah chuan ka puitling ta khawp mai. Insiamṭha thei turin hun ka ngah a, Cricket Australia-in captain tura hun ṭha min pe leh a nih chuan lawm takin ka pawm ang," tiin a sawi

Kum 2018 khan Smith hi 'ball tampering' vangin a mualpho a, captain nihna hlihsak a nih bakah kum khat chhung inkhel thei lo tura hrem a ni. June 2019 khan Smith hi ram tana khel turin a rawn kir a, Test-ah Tim Paine chu captain ni tawhin T20 leh ODI-ah Aaron Finch a captain thung.

Australia hian an rama Test match an khelh hnuhnun berah India an hneh lo a, captain Tim Paine-a'n sawisel a hlawh. Khawvel batsman ṭha ber zinga mi Smith hi Aussies tana a captain leh a nih pawhin thil mak a ni lo ang.