NBA record siamtu Westbrook

Russell Westbrook-a'n Indiana Pacers lakah triple-double neiin, a team Washington Wizards chu 132-124 in hnehna a chanpui a - basketball inelna sang berah hian sulhnu hlu tak a hnutchhiah.

Westbrook hian 35 points, 14 rebounds leh 21 assists a nei; NBA player zingah triple-double nei tawh zingah chuan point 35 leh assist vawi 20 nei tling kawp thei hmasa ber a ni.

Magic Johnson-a'n tun hmain 30 points, 10 rebounds leh 20 assists a lo nei tawh. Tunah Westbrook-a'n triple-double a neihna kawngah Johnson a point neih zat hi a rawn khum - Wizards tan match 38 a khelh aṭangin vawi 16 zet triple-double a nei ta bawk.

Kum 32 mi Westbrook chuan, "Mimal record siam chu a lawmawm, a pawimawh zawk chu kan team-in hnehna kan chang hi a ni," a ti. Wizards hian season an hmang ṭha tawk lo, vawi 17 chauh hnehna la changin Eastern Conference table-ah 12-na an ni.

Nimin zing inkhel dangah Brooklyn Nets tan James Harden chuan triple-double a nei ve bawk a, a team thar hi Minnesota Timberwolves lakah 112-107 in hnehna a chanpui; Harden hian 38 points, 13 assists leh 11 rebounds a nei.

Nets hian Kevin Durant an la chhawr thei lo a, mahse player ṭha Harden bakah point 27 neitu Kyrie Irving an kawl bawk avangin harsatna an tawk lo. Eastern Conference lamah pahnihna dinhmun an luah mek.

Western Conference hmahruaitu Utah Jazz chuan Cleveland Cavaliers 114-75 in an hneh a, tun hnaia khel ṭha tak Los Angeles Clippers chuan a zawna vawi ruk an chakna ni turin Milwaukee Bucks 129-105 in an hneh.

Inkhel dangah Golden State Warriors chuan 116-102 in Chicago Bulls an hneh ve bawk.

NBA Results
Washington Wizards 132 - 124 Indiana Pacers
Miami Heat 98 - 88 New York Knicks
Los Angeles Clippers 129 - 105 Milwaukee Bucks
Dallas Mavericks 127 - 106 Oklahoma City Thunder
Brooklyn Nets 112 - 107 Minnesota Timberwolves
New Orleans Pelicans 115 - 109 Boston Celtics
Memphis Grizzlies 120 - 110 Houston Rockets
Detroit Pistons 118 - 104 Toronto Raptors
Sacramento Kings 132 - 115 San Antonio Spurs
Utah Jazz 114 - 75 Cleveland Cavaliers
Golden State Warriors 116 - 102 Chicago Bulls