Poland an buai; England an vannei

World Cup 2022 qualifier khelh mekah zanin dar 12:15 hian England chuan Poland an mikhual dawn a, mikhual team tan Robert Lewandowski-a inlan theih dawn loh avangin England an vannei.

England-in match hnih an khelh tawhah hnehna an la chan ve ve avangin group I-ah hma an hruai mek a, an hnuai chiaha awm Poland-in point li an nei tawh thung.

Three Lions-in an hneh tawh team pahnih hi San Marino (5-0) leh Albania (2-0) an nih avangin inchhuanna tur a awm lo a, Poland hi fiahna hautak ber tura ngaih a ni.

Mahse, vanneihnain England lam a ṭang a, Poland-in an thiampuipa Lewy an hruai thei dawn tlat lo - zaninah Three Lions fan-ten point thum aia tlema lungawi an tum lo ang.

Poland buaina
White & Reds (Poland sawina) hian Pathianni zan khan an qualifier match hnihnaah Andorra chu 3-0 in an sawp a, he inkhelah hian Lewandowski chuan goal hnih a khung.

Mahse, Bayern Munich striker hi minute 63-naah a bai chhuak a, Polish FA chuan an player chhuanvawr hian a khupah hliam a tawrh thu leh ni 10 tal chawlh a mamawh tur thu an sawi.

Kum 32 mi striker hi Germany lamah inenkawl turin a kir nghal a, April 3 zana RB Leipzig an lenchilh hunah pawh Bayern tan a inlan thei dawn lo tihna a ni.

Leipzig hi Bundesliga-ah pahnihna an ni mek a, hmahruaitu Bayern nen an inkarah point li chiah a awm - tun season club inelna hrang hranga Bayern tana match 36-a goal 42 khung tawhtu inhliam hi Poland chauh ni loin Bayern tan pawh channa a tling.

Lewy chauh lo pawh...
Poland-in hliam vangin an thiampuipa an chhawr thei dawn lo a, chanchin lawmawm lo dang an nei zui - midfielder Grzegorz Krychowiak leh defender Kamil Piatkowski-te chuan Covid-19 an kai.

Lokomotiv Moscow midfielder Grzegorz Krychowiak hi Poland tana vawi 75 inlan tawh a nih avangin player ṭangkai a ni tih a chiang a, a tel lo tur hi Poland tan chuan channa a tling ang.

Kum 20 mi Kamil hi European football-a defender ṭhangduang ber pawl a ni a, a tel loa inlan a ngai tur hi Poland tan chuan nguaina tham a ni.

Poland hian kil tinah player ṭha an nei tih erawh hriat tur a ni - Lewy awm lo mah se Marseille striker ṭha Arkadiusz Milik leh Hertha Berlin striker Krzysztof Piatek an kawl a, goal khung an harsat lo ang.

Player dang
Poland tan tlarhnunga goal veng turin Juventus first choice keeper Wojciech Szczesny a awm a, midfield-ah Napoli midfielder ṭha Piotr Zielinski leh Leeds United midfielder Mateusz Klich-te an kawl bawk.

Three Lions-in player langsar zingah hliam na tak sawi tur an nei lo a, Harry Kane-a'n November 2019 hnua a vawi khat nana ram tana goal-a khung leh tak avangin an phur vanglai tak a ni bawk.

England hian an match hmasa pahnihah 4-3-3 formation hmangin an la hlawhtlinpui rih a, Poland lakah pawh Gareth Southgate-a'n he formation bawk hi a hman a rinawm.

Left back lamah Luke Shaw-a'n rintlak a nihzia a pholan leh tawh avangin Ben Chilwell aia bul ṭan leh tura ngaih a ni a, John Stones, Harry Maguire leh Kyle Walker-ten an dinpui thei ang.

Midfield & chhehvel
Southgate-a'n Euro 2020 khelh hmain Poland zawhah match hnih chiah khelh tur a nei tawh a, player siksawi chiam a hun tawh lo mai thei.

Chuti a nih chuan midfield pathumah tlarhnung venpui nuam ti mi pahnih a chhawr tel ṭhin hi a rawn chhawm leh dawn tihna a ni a, Declan Rice leh Kalvin Phillips-ten tlarhnung venpui hna thawk tel chungin tlarhma pui turin Mason Mount a awm ang.

Midfield pathum zinga khel tur hian James Ward-Prowse a la awm bawk a, Southampton midfielder hian inkhel thlak danglam tur khawpin thiamna a nei tih chu Premier League-ah kan hmu fo tawh.

Tlarhmaah Kane chu chuh phak rual loha khel tura ngaih a ni a, mual sir aṭanga thlawp turin Southgate-a'n Raheem Sterling, Phil Foden, Jude Bellingham leh Jesse Lingard aṭangin duhthlan tur a nei.