Dortmund lakah Bayern an hrang

Bayern Munich chuan Bundesliga-a anmahni el pha ber Borussia Dortmund chu Allianz Arena-ah 5-0 in an sawp a, table-ah hmahruaitu niin champion tura rinkai zawk an ni nghal bawk.

Bavarians hian kum ruk chhung a zawnin league nomawi an chawi tawh a, Dortmund nena an inkhelh dan thlirin coach thar Niko Kovac hnuaiah an champion ngei dawn niin a lang. Amaherawhchu team pahnih inthlauhna hi point khat chauh a ni tih leh match ruk khelh hmabak a la awm tih erawh hriat a ṭha.

Inrinni zan inkhelah hian Bayern tan Robert Lewandowski chuan goal hnih khungin Mats Hummels, Javi Martínez leh Serge Gnabry ten goal khat ṭheuh an khung.

Hun ṭha hlah

Borussia Dortmund-in Bayern hi an mualah an hneh tawh a, an intawn hmaa league hmahruaitu an nih avangin vawi ruk a zawna champion tawh mual 'Allianz Arena' ah hian 'palian' luhin an lut.

Ṭan phat aṭangin inkhel a nung a, Dortmund midfielder Mahmoud Dahoud chuan minute sarihna lekah goal ban a pet per a, Bayern an vannei. Mikhual team hian an chance ṭha hlah an tuar a, hemi hnu hi chuan inkhel kalhmang dang hlakin Bayern an chungnung hle.

A goal mawlh mawlh

Bayern tan minute 10-naah Mats Hummels chuan Thiago corner pet chu a tauh lut a, goal khatah duh tawk loin an nawr chhunzawm a, Dortmund tlarhnung a pherh bawk.

Minute 17-naah Dan Axel-Zagadou ball pass chu Bayern forward Lewandowski chuan dang hmanin a lalut nghal a, Dortmund keeper Roman Burki-a'n a pet hmasak dang mah se Polish forward hian a per chu scissor kick hmangin goal ruakah a khung.

Dortmund keeper Burki-a che ṭha chhunzawm a, Lewandowski leh Hummels te goal khung tur ṭha takin a dang. Amaherawhchu Bayern goal nawr na tak dan reng theih a ni lo a, minute 41-naah Thiago freekick fing tak chu Thomas Muller-a'n a volley a, hemi per zel hi Martinez chuan goal kilah tak a pet lut.

Minute hnih hnuah Muller-a ball fing tak chu Serge Gnabry chuan hnai tak aṭangin a tauh lut a, Dortmund defender Manuel Akanji-a'n a tihtur a ti tawk lo. Second half-ah pawh Bayern bawk an che ṭha a, goal erawh vawi khat chiah a lut tawh. Minute 89-naah Dortmund tlarhnung chiang taka ṭhiatin Gnabry-a ball pek chu Lewandowski-a'n goal ruak ah a khung.

Lawm leh lawm lo

Bayern Munich manager Niko Kovac chuan, "Minute 90 chhung kan khelh dan kha duhthusam a ni a, chutah pawh first half kha a ṭha lehzual. Kan nawr na em em a, goal kan khung tam bawk. Goal khung tam hi tuna kan dinhmunah chuan a pawimawh a ni. Kan khelh danah khan ka duh zawng zawng chu a kim a, season tir aṭanga ka beisei chu ka hmu ta chiah e. Tun aia goal tama chak thei kan ni," tiin an khelh danah a lawm hle.

Borussia Dortmund captain Marco Reus chuan, "Kan khel chhe tawp khawk a, goal venhim kawngah kan hlawhchham. Khati taka kan khelh chhiat chhan kha ka sawi thei lo. Bayern tan khan harsatna kan siam miah lo a, kan result hi kan pawm a ṭul," tiin an khel chhia tih a pawm thlap.

Goal khung thei Lewy

Kum 30 mi Robert Lewandowski chuan Bundesliga-ah goal 201 a khung ta a, goal 200 khung thei pangana a ni. Bayern legend Gerd Muller chuan goal 365 tehmeuh a khung avangin tluk phak rual a ni lo a, ani bakah hian Klaus Fischer (268) khum a harsa dawn. Chutihrualin Bayern tana a khelh zel chuan Jupp Heynckes (220) leh Manfred Burgsmuller (213) te erawh a umpha thuai dawn niin a lang.

Lewandowski hian goal 200 khung tling turin match 284 a mamawh a, match 234 chiah mamawhtu Gerd Muller chiah a tluk lo. Polish striker hi German mi ni lo Bundesliga-a goal khung tam ber a ni.