Serie A champion Juventus?

Juventus chuan AC Milan 2-1 a hnehin Serie A hmahruaitu an nihna a sang fal zual a, nizan inkhelah Napoli chu Genoa lakah an tlawm a nih chuan Turin club hi Italian champion an ni ang.

Inrinni zan inkhelah Milan striker Krzysztof Piatek-a'n minute 39-naah goal hmahruai a khung. January thla a pound maktaduai 35 senga an lakluh hian a club thar tan match 11 aṭangin goal riat a khungna chiah a ni.

Second half-ah Juve lamin na takin an vaw let, Mario Mandzukic leh Paulo Dybala ten Pepe Reina tan hna hautak an siamsak hnuah Argentine forward hian penalty a hlawh chhuak a, an goal phurh sut nan a hmang nghal.

Massimiliano Allegri-a'n goal an mamawh zia hriain rawlthar duhawm Moise Kean a dahlut. Kum 19 mi Kean hian ram leh club tan tun hnai a match nga chhunga a goal ngana khungin a club a chakpui.

Juve tan nomawi a hnai a, chak lo Milan erawh an match hnuhnung paliah chak ni hmel an hmuh theih loh avangin Champions League khelh an tumna a derthawng mek - palina ni mah se an hnuaia awm Atalanta aiin point khat chauhin an sang a, match khatin an khel hnem zawk.