Mapuia Cricket League khel dawn

Mizoram cricket-a sum tamna ber Mapuia Cricket League chu April 22 aṭangin khelh ṭan a ni dawn a, Cricket Association of Mizoram chuan team tling sa pali bakah hmun ruak pahnih chu an lilam dawn.

Team paruk inelna league-ah hian 1st division inelna neih zawh taka palina chin Zarkawt Lords, Kulikawn CC, Chhinga Veng CC leh Ramhlun Venglai CC te chu tling chiang sa an ni a, hmun ruak pahnih hi lilam a ni leh dawn ta a ni.

MCL-a tel duh club-te hian hmun ruak chu a hniam berah Rs. 50,000 aṭanga an ngam a ngai dawn a, a chhang huai club pahnihin hmun ruak pahnih hi an chang ang.

LPS-a live-a pekchhuah ṭhin tur inelnaa tel duh club te chuan an duhna hi MCL hnenah emaw e-mail hmangin cricketassociationofmizoram92@gmail.com-ah thehluh tur a ni a, security atan Rs. 5000 pek tel tur a ni bawk.

Hmun ruak lilamna hi April 13, zan dar 8:00-ah neih tur a ni dawn a, hemi rual hian player 50 lilam an ni dawn bawk. MCL-ah hian lawmman atan ringawt Rs. 3,25,000 sem ral tur a ni dawn a ni.