Saints khelmualah Liverpool an 'comeback'

Premier League champion nih tum Liverpool chuan Southampton khelmualah goal chhuah hmasa zet mah se comeback ropui an lantir a, an mikhualna ramah Saints hi 3-1 in an hneh. Liverpool tan league match ruk zet goal a khung tawh loh hnuah Mohamed Salah chuan 'solo' goal ropui a khung a, Naby Keita leh Jordan Henderson ten goal khat ve ve an khung bawk.

Reds-in hnehna an chan leh tak avangin Premier League table chung berah an awm leh ta a, anni aia match khata khel tlem Manchester City aiin point hnihin an sang mek. Liverpool boss Jurgen Klopp chuan, "Season hautak a ni a, Champions League khel tur pawhin 70-75 points tal hmuh a ngai a, champion tur phei chuan 90+ a ngai a ni," a ti a, hmabak an la neih thu a sawi.

Goal khatna

St Mary's khelmualah mualneitu team-in Liverpool an barakhaih a, Shane Long chuan minute kuana lekah goal hmahruai a rawn khung - Liverpool fans an hlauthawng. Relegate thei dinhmuna la ding Saints an tumah an chiang a, goal an khung hnuah an tawlh hnung a, Liverpool tlarhmain an chhaih buai hleithei lo.

Mahse, minute 36-naah Reds fans hlauthawng lutuk tur beng daih nan Naby Keita a inlar a, Trent Alexander-Arnold hnen aṭanga a ball hmuh chu Liverpool tana a goal hmasa ber ni turin a khung. Goal dang lut loin chawlhlawk hman a ni a, Liverpool-in Saints tlarhnung an rum ṭhaih nawn thei lo.

Captain Hendo

Klopp-a'n goal nawr an harsat tih a hmu a, minute 59-naah English midfielder pahnih Jordan Henderson leh James Milner a luhtir a, Reds goal nawr a na sawt. Hun tawp nan minute 10 chauh a awm tawh tihah Liverpool fan-te an thaw huai a, point khatah lungawi a ṭul mai dawn nia an hriat hnuah Salah chuan hmahruaina goal a rawn khung a, 2-1 in hma an hruai.

Klopp-a susbtitution siamin awmzia a nei tih loh rual a ni lo a, goal an khung hnuah an phur sawt - Hendo chuan captain rintlak a nihzia pholangin minute 86-naah an goal thumna a rawn khung. Liverpool boss Jurgen Klopp chuan, "Milner leh Hendo khan min pui a ni. An huaisenin an paukhauh a, player dang an nawr kal dan kha in hmu a ni," a ti a, senior player pahnih a fak.

Salah = 50

Egyptian forward Salah goal a ropui a, sawiselna tawk ṭhin mah se player class sang tak a nihzia hmuh turin a awm leh ta - Premier League-a goal 50 a khungna chiah a ni bawk.

Liverpool boss Klopp chuan, "Goal ropui tak a ni a, Firmino kha position dik taka a awm theih loh avangin ball a pe thei lo a, kha tak khan a tan hmun a siam a ni. 'Wow' tia sawifiah a awlsam ber," tiin Mo Salah goal khung mawi a sawi. Salah hian Premier League-a goal 50 khung tling tur hian match 69 a mamawh a, Alan Shearer (66) leh Ruud van Nistelrooy (68) te chu Premier League-a goal 50 khung tling tura match mamawh tlem lama a phak loh an ni.

Liverpool player zingah chuan Fernando Torres (72) kha Premier League-a goal 50 khung tling tura match mamawh tlem ber a ni ṭhin a, Salah hian a rawn khum ta.