Mizoram cricket roreltu Zarkawt Lords

Cricket Association of Mizoram enkawlna hnuaia cricket inelna sang ber Mahuma Memorial Cricket Tournament chu Inrinni khan khelh zawh a ni ta a, Zarkawt Lords an champion.

Suaka Memorial Cricket Ground, Sihhmuia inkhelah Zarkawt Lords hi Kulikawn CC nen an inhnehtawk a, mahse innings khatna an lak tawh avangin Zarkawt club hi champion-ah puan an ni ta zawk a ni. Zarkawt Lords hian kum 2009 khan first division nomawi an lo chawi tawh a, kum kua zet a liam hnuah Mizoram-a cricket club thiam ber dinhmun an luah ve leh ta.

A vawi khatna

First innings-ah ṭhumvawra vannei zawk Zarkawt Lords-in vawm hmasak an thlang a, Kulikawn CC an bat hmasa zawk - over 49.2 thleng rawn daihin run 127 an vaw chhuak a, run 52 siamtu Parvez Ahmed-a'n run a siam hnem ber.

Lords bat hun a thleng - an thiampuipa leh tun inelnaa player hmuhnawm bera chhal ngam Pratik Pratap Desai chuan run 71 a rawn siam a, over 77-ah run 184 an tlin. First innings-ah Zarkawt Lords-in run 57-in hma an hruai a, dinhmun ṭha zawk an ni.

Zarkawt club dinhmun ṭhat nan C. Lalrempuia chu player thawhhlawk a ni a, Lords bowler hian over 12.2 a vawmah run 29 chiah a pe a, wicket nga a la thung!

A la tawp lo

Second innings-ah Kulikawnin run 142 an vaw chhuak a, run 66 siama a tawp thleng dam Raihan Jomeel a che ṭha hle - over 31-ah wicket riat an hloh a, first innings-a hnufual zawk Kulikawn hian 'risk' lain an duhtawk.

Zarkawtin second innings-ah over 25 thleng an bat hman a, run 84 siamin wicket li an hloh - hetihlai hian chak turin run hnih chiah mamawh tawh mah se nikhata minimum overs (90) khelh tur zat an khel tling tawh a, umpire ten inkhel titawp turin thuneihna an nei.

First innings-ah hma an hruai avangin inkhel hi tihtawp pawh ni se Zarkawt tho hi champion tur an nih avangin umpire ten inkhel an titawp zui a, Zarkawt an champion.