Pro volleyball fixture a chhuak

Tualchhung volleyball inelna lian leh ngaihhlut ber Suzuki Gixxer Pro Volleyball fixture leh handbook tlangzarhna chu Inrinni khan neih a ni. Inelna tak hi April 16, Thawhlehni aṭangin Hawla Indoor Stadium, Republic Vengthlangah neih tur a ni.

Mizoram volleyball leh Nivia ten inremna an neih avangin tun ṭum PVL-ah hian Nivia ball an beng ang. Pro Volleyball League hi vawi li neihna tur chiah a ni a, champion lai Hunthar chuan an match hmasa ber atan TNT, Muanna Veng an hmachhawn dawn.

PVL-ah hian team paruk - Hunthar, Durtlang North, Chanmari West, Tuichangral, Chhinga Veng Spikers leh Anastasia Electric Veng te an inel dawn, tualchhung player ṭha an kim dawn bakah state pawn aṭangin team ti chak tur chah luh leh an ni bawk ang.

A tira ruahman dan chuan PVL hi March 20 aṭangin R. Dengṭhuama Indoor Stadium, Mualpuia khelh tura ruahman tawh a ni. Mahse, Lok Sabha inthlanpui avangin a hmunah harsatna a awm a, ṭan hun sawn hlat a ni.

MVA hi an inelna lian ber an khelh theihna tura Hawla Indoor Stadium ruahmanna siamsaktu sports minister Robert Romawia Royte chungah an lawm hle. Ani hmalakna avang hian April 16 aṭanga May 16, 2019 thleng chu PVL khelh nan ruahman sak an ni.