Muguruza-i'n nomawi humhim

Garbine Muguruza chuan Monterrey Open nomawi a kawl lai chu a humhim. Spanish nula hi a khingpui Victoria Azarenka chu set hnihna an khelh laiin a inhnukdawk a, hah lutuk loin hnehna a chang.

Nimin zinga final inkhelah world number 1 Azarenka hlui hian tun hnai kum thum chhunga a final hmasa ber a khel ve leh chauh a ni a, mahse set khatna an khelh zawh hnuin a chawn dinglam na enkawl a ngai.

Wimbledon champion tawh Muguruza-i'n set khatna 6-1 in a la a, set hnihnaah pawh 3-1 a hma a hruai leh laiin Belarus nula Azarenka hi a inkhel chhunzawm thei ta lo a ni.

Kum 25 mi Muguruza chuan, "Ka tan chuan chawlhkar ṭha tak a ni. He hmuna ka rawn kir leh hi ka lawm a, nomawi ka humhim hi ka lawmna ti zualtu chu a ni," tiin a sawi. Nikuma Mexico Open hnuah Muguruza tana a nomawi hmasa ber a ni.