Western Conference pakhatna GSW

Golden State Warriors chuan nimin zing khan Los Angeles Clippers 131-104 in an hneh a, NBA regular season kal laiah Western Conference hmahruaitu an ni tlang dawn tih a chiang nghal bawk.

Warriors hian an khelmual Oracle Arena hi season 47 chhung an hmang tawh a, nimin zinga an inkhel hi regular season bikah chuan an khelmuala an khelh hnuhnung ber a ni tawh dawn. Playoff erawh khelh hmabak an la nei a, season thar aṭang chuan khelmual thar 'San Francisco' an hmang tawh ang.

GSW tan hian an thiampuipa Stephen Curry chuan point 27 a score a, Kevin Durant chuan point 16 a nei bawk. Warriors hian tun hnai an match hnuhnung pangaah hnehna an chang vek - tun season chhungin vawi 56 hnehna chang tawhin ṭum 24 an tlawm thung a ni.

Golden State coach Steve Kerr chuan, "Warriors ṭantute nen hian season 47 chhung he hmunah hian hun harsa leh hrehawm kan hmang ho tawh, engtikah mah sulhnu awm tawh sa hi theihnghilh a ni lo ang," tiin a sawi.