India hmeichhe team hma hun a chiang dawn

2020 AFC Women's Olympic Qualifying Tourna­ment khelh mekah India hmeichhe team chu vawiin chawhnu dar 2:30 hian Myan­mar nen an inhmachhawn dawn a, he inkhela chak zawk hian third round an lut ang.

India hmeichhe team hian first round an paltlang hnuah second round an lut a, second round-ah hian Indonesia leh Nepal hneh zuiin Myanmar chiah an hmabak tawh.

First round-ah khan India leh Myanmar hi lo inhmachhawn tawhin 1-2 in Blue Tigers hmeichhe team hi an lo tlawm tawh a, vawiinah phuba lakna remchang an nei dawn.

India hmeichhe team hian hnehna an chang a nih chuan third round an lut ang. Third round-ah hian team pariat chu group hnihah ṭhen an ni leh ang a, group pahniha a sang pahnih ve vein final round an lut dawn.

Final round hi semifinal ti pawha sawi theih a ni a, he inkhela chak zawk team pahnih chuan Japan-a neih tur 2020 Olympic-ah Asia khawmualpui aiawhin hmei­chhe football an khel dawn a ni.

AFC aṭangin team hi pathum tel theih a ni a, Japan chu inelna thlengtu an nih avangin tling chiang sa an ni.