Clay-ah Keys a champion

Madison Keys chuan Caroline Woz­niacki 7-6, 6-3 a hnehin Charleston Open nomawi a chawi a, American nula hian clay court inelna huang bikah chuan hlawhtlinna a channa hmasa ber a ni.

Pathianni zan final inkhelah kum 24 mi Keys hian a ball vuak nat hmang ṭangkaiin win­ners vawi 54 a vaw chhuak, seeded pa­ngana Woz­niacki hian theih tawpin bei let mah se 2011-a champion tawhna hmunah ropuina a chang zo ta lo.

Keys hi seeded pa­riat­na pek niin inelna neih tirh lam kha chuan champion tura rinkai a ni phak lo. Mahse, nomawi a chawina kawngah hian player ṭha tak tak - Wozniacki, Sloane Stephens leh Jelena Osta­penko te bakah Olympic champion lai Monica Puig a hneh thei a ni.

Kum thum liam ta khan Stephens chuan Charleston-ah hian hlawh­tlinna a lo chang tawh a, American nula zing­ah Stephens hnuah world number 18 Keys hi cham­pion leh thei hmasa a ni.

Tennis a khelh hun chhunga nomawi pali chawi tawh Keys chuan, "Tun tournament chu ka service a ṭha thei em em a, ka khingpuite na taka ka nawr theihna chhan ṭha tak pawh a ni," a ti. Final bikah hian a service hmasa aṭangin 76% point a hmuh a, vawi ruk aces a siam bawk.

Hard court season hma­sa lam an hmang zo rih a, clay court inelna lian ber French Open chu May 26 aṭanga khelh tur a ni dawn - Keys tan tun inel­na hi Roland Garros atana in­buatsaihna ṭha tak a ni ang.