Everton lakah Arsenal an chak lo

Arsenal chuan Premier League table-a pathumna dinhmun luah theihna leh Tottenham Hotspur chunga awm theihna hun ṭha an neih chu an bawhpelh. Unai Emery naute hi Everon lakah 1-0 in an tlawm a, palina niin an hmelma Spurs hnuaiah an awm.

Pathianni zan Goodison Park-a inkhelah chawpchilh taka bul ṭan hnuhnawh Phil Jagielka chuan minuite 10-naah goal awmchhun a khung, Lucas Digne-a ball theh na tak Dominic Calvert-Lewin tauh per chu English defender hian hnai tak aṭangin a khung.

Chak phu Toffees

Inkhelh ṭan hma minute 15 chauh a awm tawh tihin Everton lam hian damlohna vangin Michael Keane a inlan theih loh tur thu an sawi a, squad aṭanga dah chhuah a nih avangin a hmun ruak luah turin Jagielka dah luh a ni.

Everton captain hian scoresheet-a a hming chhu kai turin khelmual a luh aṭanga minute 10 bak a mamawh lo. Kum 2017 April thla hnua club tana a goal hmasa ber khungin Champions League khelh tum Arsenal a barakhaih.

Marco Silva nauten inkhel an thunun zui a, forward Richarlison leh Bernard ten Gunners wing back pahnih an chhaih buai hneh hle. Ainsley Maitland-Niles tihsual vanga ball ṭha neitu Bernard hian an goal hnihna khung turin Bernd Leno chauh hmachhawn tawh mah se Germany keeper hi a paltlang zo lo.

Richarlison-a ball thai let dawngtu Gylfi Sigurdsson pawhin goal zawnah a pet thei lo a; Bernard, Andre Gomes leh substitute Theo Walcott te chu Toffees tana hun ṭha hlah tu langsar an ni bawk.

Everton manager Silva chuan, "Ka hlim takzet, point thum hmuh hi kan phu a ni. Hun ṭha kan siam hnem a, goal tam zawk pawh khung thei tur kan ni. Clean sheet kan neih belh leh, ka naute rilru put hmang a dikin chona kan hmachhawn dan hi ka duhzawng tak a ni," a ti.

Liverpool nen an inhnehtawk hnuah Toffees hian Newcastle hneh lo mah se, goal chhuah loin Chelsea, West Ham leh Arsenal te an hneh thei - point 46 hmuin pakuana dinhmun an luah. March 13, Inrinni zanah tla chiang tawh Fulham nen an inhmachhawn leh ang.

Arsenal an chuai

Goodison Park-ah Arsenal hian hliam vangin Granit Xhaka an la chhawr thei lo a, midfield-ah Matteo Guendouzi leh Mohamed Elneny te inkawp chuan inkhel an thunun phak lo a, Portuguese midfielder Andre Gomes rorelna hnuhnuaiah an kun avangin Gunners inkhel a nung thei lo.

Bench aṭanga Aaron Ramsey leh Pierre Emerick-Aubameyang te an luh hnuah hma an sawn hret. Mahse, Welsh international midfielder hian box chhunga ball kang a hmuh chu goal zawnah a pet lo a, Gabonese striker pawhin ṭum dang angin danglamna a thlen thei lo - French striker Alexandre Lacazette pawhin a hun ṭha neih chu keeper zawnah a tauh.

Mesut Ozil-a'n ball pass mawi nei zauh ṭhin mah se ṭum danga a inkhel a phak lo a, manager Emery-a'n a chhawr rim Alex Iwobi leh khelh fuh chang nei Henrikh Mkhitaryan te pawhin Jordan Pickford tan hna hautak an siamsak thei bik chuang lo.

Arsenal hian pathumna nih theihna hun bawhpelh mah se palina an la ni tho a, season thara Champions League khel turin an dinhmun a la ṭha. Amaherawhchu, match khelh hmabak paruk an neih zinga pali chu khualmualah an khel dawn. Khualmuala match 11 an khelh aṭanga vawi sarih ngawt chak lo team tan ngaihṭha taka awm theih a la ni lo ang.

Gunners manager Unai Emery chuan, "Thleng sang tur chuan match 38 ṭha taka khelh a ngai, tun ṭumah kha chuan kan khel ṭha lo a ni. Point thum kan hloh a ni a, palina china awm hi kan kuta awm a nih rualin team dang pawh an ṭha tih kan hriat a ṭul. Match lehpekah chuan nasa lehzualin kan ṭang ang," a ti.

March 11, Ningani zanah Arsenal hi an inlan zui dawn a, Europa League quarterfinal khel turin Italian club ṭha Napoli chu Emirates Stadium-ah an mikhual ang a, April 16-ah Watford an lenchilh leh dawn a ni.