Champions League-ah Spurs Vs City

English club ṭha Tottenham Hotspur leh Manchester City te chu Champions League-ah a vawi khat nan zanin dar 12:30 hian khelmual thar Tottenham Hostpur Stadium-ah an inhmachhawn dawn.

Spurs hian Crystal Palace nen an mual thara an inhmachhawn hnuah ni ruk an awl thei a, Man City erawhin Inrinni zan khan FA Cup semifinal-ah Brighton & Hove an hneh thung.

Man City manager Pep Guardiola chuan, "Spurs hi an hahdam avangin an dinhmun chu a ṭhat phah ngei a, pawi erawh kan ti lo. Inelna hmachhawn tur chu nei lo ila kan hahdam phah ngei ang, amaherawhchu chona hmachhawn chu kan duh zawk a ni," tiin nomawi pali an la beisei avanga an khelh tam bik chu a duh zawk thu a sawi.

Premier League champion lai hian squad chhah ṭha tak an nei a, Sergio Aguero a khel thei lo a nih pawhin FA Cup semifinal-a chakna goal khungtu Gabriel Jesus an kawl. Left Back-a chhawr turin Aleks Zinchenko a dam hman lo a nih pawhin Benjamin Mendy a dam tawh. Postion tinah an ṭha em em a, inelna hrang hranga an match hnuhnung 23 aṭangin vawi 22 an chak thei a, London club tan an awlsam dawn lo.

Amaherawhchu, Spurs hian khelmual thar nawmna an tem tawh a, Champions League quarterfinal-a Man City an hneh thei a nih chuan Palace an hneh ṭum boruak aia nuam zawk an hmaah chhawpin a awm.

Club pahnih hi an intum chho mawlh mawlh dawn a, kartawp hian Spurs khelmualah bawk Premier League-ah an inhmachhawn dawn a, karleh lamah Etihad Stadium-ah second leg khelh a ni dawn. Match thum pawimawh vek a ni a, Champions League pawimawh zia sawi nawn a ngai lo a, Premier League pawh hi a chak lo zawk tan chuan champion nomawi chan theihna leh season thara Champions League inlan loh phah theihna a ni.