Van Dijk-a'n Sterling a thlang

Liverpool defender Virgil van Dijk chuan PFA player of the year-ah Manchester City forward Raheem Sterling a thlang a, City player dang zingah pawh duh a neih nual thu a sawi!

Dutch defender chuan, "Dik bera ka ngaih angin vote ka thlak a, Sterling hian he chawimawina dawn hi a phu a ni," a ti - Liverpool forward hlui Sterling hian league-ah goal 15 a khung tawh.

PFA player of the year-ah hian player-ten club khat tana an khelhpui an thlang thei lo. Van Dijk chuan, "Sterling hian season duhawm tak a hmang mek a, Bernardo Silva leh City player dang zingah pawh thlan phu tak tak an awm.

"Dik takin thutlukna ka siam. Sterling hian nasa takin hma a sawn a, mimal chawimawina hi a dawn leh dawn loh chu kan hre thuai ang chu," a ti.

Van Dijk hi PFA player of the year chawimawina dawn phu ber pawl a ni a, Liverpool-in Manchester City nena Premier League nomawi an inchuhna kawngah player pawimawh a ni.

Pound maktaduai 75 man defender chuan, "League-a team zawng zawng hi zawt ila, kan dinhmun angah hian awm an chak vek ang. Dinhmun duhawm takah kan awm mek," a ti.

VVD chuan rilru paukhauh a ṭul thu sawi nghalin, "Media leh social media-a thuziak tam tak chhiar chuan rilru a buai duh em em a, rilru huaisen tak put a ngai a ni," a ti a, champion tur chuan paukhauh a ṭul thu a sawi.

PFA Awards hi April 28-ah sem a ni ang.