EFL Awards Norwich striker Pukki a thiam ber

Premier League hnuai lama awmte puala award an sem ṭhin, English Football League Awards sem a ni a, Cham­pionship Player of the Season atan Norwich City striker Teemu Pukki chu thlan a ni.

Finland international Pukki hian he chawimawina dawng tur hian Sheffield United striker Billy Sharp leh Birmingham City midfielder Che Adams te a khum. Kum 29 mi striker hian Norwich tan season duhawm tak a hmang mek a, league match 33-a khelhah goal 26 khungin assists vawi kua a nei thei a ni.

Hetihlai hian Young Player of the Season chawimawina chu Norwich full-back Max Aarons hnenah hlan a ni a, kum 19 mi rawlthar duhawm hian Harry Wilson leh James Justin a khum.

Pukki a hlim

English football-a a season hmasa ber hmangtu Canaries forward Pukki chuan, "He chawimawina dawn theih hi ka tan chuan thil ropui tak a ni a, ka hnathawhte hriat sak ka ni hi ka lawm takzet a ni.

"Player ropui tak tak he hmunah hian an awm a, hei hian he award hlutna hi a belhchhah a ni. Season duhawm tak kan hmang mek a, hetihrual hian match khelh tur tam tak a la awm," tiin a sawi. Norwich hian Champion­ship-ah table chung ber an luah mek a, anmahni hnaih bertu Sheffield United aiin point sarihin an la sang zawk - match ruk chiah khelh tur a awm tawh.

Championship aṭang hian pakhatna leh pahnihna chu Premier League-a tling chiang an ni a, pathumna aṭanga pa­ruk­na ten playoff hmangin hmun ruak dang an inchuh leh ang.

Rawlthar duhawm

Young Player of the Season-a thlan Aarons hian senior level-a a season khatna a hmang ve chauh a, Cham­pionship match 35 inlanin goal thum a khung tawh.

Kum 22 mi Harry Wilson hi Liverpool aṭangin loan-in Derby-ah hian a khel mek a, Championship-a a hun hman dan hi Reds fans tan chuan hriat a nuam khawp ang. Wales international hian tun season-ah league match 33 khelin goal 12 a khung tawh a, set piece pet thiam bik a ni.

Luton Town rawlthar duh­awm James Justin hi League One khel chauh la ni mah se club liante chil ti puttu a ni der tawh a, season tharah club lian zawkah Aarons nen hian kan hmu a nih pawhin a mak lo ang.

Chawimawina dang

English third division league 'League One' lamah chuan Luton Town striker James Col­lins chu player ṭha berah thlan a ni a, kum 28 mi hian tun season-ah league match 40 khelin goal 22 a khung tawh. English football league-a division hniam ber League Two lamah chuan league match 39 khelh tawha goal 27 khungtu James Norwood chu player ṭha berah thlan a ni thung a, English striker hi Tranmere Rovers tan a khel mek.

Sheffield United striker Billy Sharp-a'n Championship Player of the Season ni turin Pukki phak lo mah se chawimawina dang erawh hlan a ni tho a, kum 33 mi striker hi kum 2000 hnu lama EFL-a goal khung hnem ber a nih avangin Moment of the Season award hlan a ni.

Kum 33 mi striker hian January khan Wigan Athletic lamah a goal 220-na khungin record a siam a, goal sarih khung leh tawhin goal 227 a khung tawh - tun season bikah league match 35 khelin goal 23 a khung tawh.

EFL Awards (Chawimawina dang)
Apprentice of the Year
- Max Bird (Derby County)
PFA Player in the Community
- Will Vaulks (Rotherham United)
Sir Tom Finney Award for Career
Contribution to the EFL
- Joe Thompson (Rochdale)
Community Club of the Year
- Portsmouth
Family Club of the Year
- Doncaster Rovers
Contribution to League Football
- David Allison
Supporter of the Year
- Roger Groves & Mike Davis (Shrewsbury Town)