East Bengal-in ISL khelh an duh

I League club East Bengal thu­neitute chuan season thar aṭanga Indian Super League khelh ngei an duh a, an duhna hi an thawhpui Quess Corp chairman Ajit Isaac hnenah an thlen leh ang.

Quess East Bengal FC board member Debabrata ‘Nitu’ Sarkar chuan, "Kan chairman Ajit Isaac hnenah lehkha kan thawn ang a, a rang thei ang bera board ko turin kan ngen dawn a ni," a ti.

Nitu chuan sawi zawmin, "ISL-ah tel kan duh thu hi kan hrilh dawn a, Calcutta Football League (CFL)-ah squad ṭha thei ang ber neih kan duh bawk," a ti a, CFL pawh tih mai mai an tum lo.

Super Cup khelh leh khelh loh chungchangah East Bengal-a tun hma aṭanga thuneitu lo ni tawhte leh sum tam tak sengtu Quess Corp te chu an ngaihdan a lo in ang tawh lo a, tuna ISL khelh chungchangah pawh hian an buai leh viauin a rinawm.