Zanin dar 12:30-ah Man United Vs Messi

UEFA Champions League quar­terfinal inkhel tur zinga ngaihven hlawh ber ang hiala sawi theih chu zanin dar 12:30-a Manchester United leh Barcelona te inkhel tur hi a ni a, Old Trafford-a inlan tur zingah hian Lionel Messi chu player langsar ber a ni.

Ole Gunnar Solskjaer hote hian quarterfinal lut turin French champion Paris Saint-Germain an hneh a, amaherawhchu tun ṭuma an khingpui tur erawh Messi telna Barca an ni a. Argentine forward hian Manchester United vanglai tiha an sawi ṭhin Sir Alex Ferguson-a hote kha final-a an hmachhawn ṭumin an hneh ve ve a, goal a khung ve ve bawk.

Messi chu

Barcelona hian La Liga-a an elpui ber Atletico Madrid chu kartawp khan an mikhual a, 2-0 in an chak. Goal khungtu chu Messi a ni a, goal pakhat zawk hi Luis Suarez khung niin Uruguayan forward hi United hmelma Liverpool 'hero' ṭhin a la ni cheu bawk.

Messi hian tun season UCL-ah goal riat khung tawhin top scorer a ni mek a, Altetico Madrid nena a khelh ṭuma a hmuna entu Solskjaer hian midang hmuh loh a hmu fuh a ni ngawt loh chuan 'mi bik' dan dan tur hi a zirchhuah mai a rinawm lo.

Final-a an intawn hnunun ber ṭum khan Barcelona enkawltu chu Pep Guardiola a ni a, hetihlai hian Messi chu player ṭha ber a nih thu a sawi. Bayern Munich a enkawl hnuah Guardiola hote hian semifinal-ah Barcelona hi an hneh lo a, Messi ṭhat zia bawk a sawi. Premier League-a sulhnu nei ṭha ber zinga mi Alan Shearer pawhin Messi a dah sang hle. England captain hlui hian Man City-in quadruple an theih lohna chhan tur chu Barcelona a ni a, Messi vang a ni tiin a ngaihdan a sawi chhuak.

United manager hlui Sir Alex Ferguson pawhin an intawn hnuhnun ber ṭuma an hneh loh pawhin Barcelona chu team ṭha zawk an nih thu zep lo a, khami ṭuma United defender te kha Nemanja Vidic, Rio Ferdiand leh Patrice Evra te niin keeper pawh Edwin van der Sar a ni a, Messi telna Catalan club an dang thei chuang lo.

Tunah hian Messi hi kum 31 a ni tawh a, chutichung chuan a khelh zat aiin a goal khung zat a la tamin inelna hrang hrang match 40 a khelh tawhah goal 43 a khung tawh a, Argentine forward chanchina sawi hmaih thiang lo chu goal khung tura midang siam a hreh lo tih lai hi a ni.

Messi bakah hian Barcelona player dang hi an la hraw hle. Suarez hi goal hmaah a hriam leh tawh a, Philippe Coutinho ṭhatzia chu Premier League thlir ṭhin chuan an hria a. La Liga thlir ṭhin tan chuan Ivan Rakitic leh Sergio Busquets te hi an zuna uaina tham a ni a, Ousmane Dembele pawh hi pound maktaduai 135.5 man a ni a, sum seng tam United aiin Barcelona hian sum an la seng huai zawk tih hriat tel a ṭha bawk.

Engtin zel?

Manchester United erawh Paris khawpuia PSG an hneh zawha hlimna vawrtawp an chan hnuah chuai lam an pan a, hemi hnu hian nomawi an beiseina sang ber FA Cup chu Wolverhampton Wanderers lakah a thamral. Premier League lamah pawh Arsenal leh Wolves te an hneh lo a, an hneh chhun pawh Watford an ni.

Amaherawhchu United manager Solskjaer hian a inkhelh hun laiin Barcelona hi a hmachhawn tawh a, ṭum hnih ngawt 3-3 a inhnehtawk ṭum khan a tel ve ve a. Catalan club khelmual Nou Camp-a an champion ṭum khan Bayern Munich lama chakna goal khungtu a nih bawk avangin a naute fuihna tur chu a nei ṭha khawp ang.

United boss Ole Gunnar Solskjaer chuan, "Khawvel club lian ber leh team ṭha ber intawng hi kan hmu châk tlang a ni. Kum 2009 leh 2011 final-ah te khan intawng a, 2008 semifinal-a kan intawn ṭumin Scholesy-a'n chakna goal a khung. Hetiang inkhel en châk hian min ṭantute an tui hal a, keini pawh kan phur a ni," tiin a sawi.