Match thuma goal khung vek Siami

India hmeichhe hockey team tan Lalremsiami Hmar chu player pawimawh leh langsar a ni mek zel. Siami hian tun hnai India tana match a khelh hnuhnung pathumah goal a khung vek.

Intuaihriam turin India hian Malaysia-ah tour an nei mek a, Malaysia nen hian match nga an khel ang. Match hmasa berah India hi 3-0 in an chak a, match hnihnaah 5-0 a chak lehin a ṭum thum naah chuan 4-4 in an inhnehtawk - heng inkhel pathumah hian Siami'n goal khat ṭheuh a khung.

Asia Cup 2017 champion India hian Tokyo Olympic 2020-a inlan ngei an tum a, Hockey World Cup-ah an duhthusam result an neih loh avangin quali­fying a hautak dawn. Malaysia-a an kal hma hian Spain-ah intuaihriam tur bawkin tour an lo nei tawh bawk.

Kolasib nula Siami hi tun hnaiah India tan koh a ni ziah a, tun ṭumah hian captain Rani Rampal a awm loh avangin Siami koah hian goal khung kawngah mawhphurhna a sang hle a, ramin a mamawh ang takin Mizo nula hian a chhanna a pe zel a ni.

India hian vawiin tlai dar 5:35 hian an match lina an khel leh dawn a, April 11-ah match ngana an khel leh bawk ang.