Portugal an chak, Ronaldo-a'n goal a khung

World Cup Qualifying-ah Thawhlehni zan khan Portugal-in Luxembourg 3-1 in an hneh a, Cristiano Ronaldo-a'n goal a khung. Juventus forward Ronaldo hian ram tan goal 103 a khung tawh a, ram tana goal khung tam ber Ali Daei a phak lohna chu goal ruk chauh a ni ta.

Group A inkhel dangah Serbia-in Azerbaijan 2-1 in an hneh a, Fulham striker Aleksandar Mitrovic-a'n goal hnih a khung. Kumin June thla aṭanga European Championship khelh a nih dawn avangin World Cup khel tur zawnna hi September aṭanga khelh chhunzawm a ni leh chauh ang.

Tu nge Rodrigues?
Josy Barthel-ah Luxembourg-in bul an ṭan ṭha zawk. FIFA Ranking-ah Luxembourg hi 98-na chauh ni mah se kartawp khan Republic of Ireland an hneh a, Portugal tan pawh an awlsam lo.

Dublin-a goal awmchhun khungtu Gerson Rodrigues-a'n minute 30-na lekah ṭha zetin a tauh goal a, mak tak maiin Luxembourg-in goal an khung hmasa. Khawvelin Gerson Rodrigues-a chanchin ngaihven nghal a, Luxembourg forward hi Lisbon khaw bul Almada, Portugal-a piang a ni.

Rodrigues hian French club FC Metz aṭangin a football career a ṭan a, Luxembourg club hrang hrang FC Swift Hesperange, Racing FC Union Luxembourg CS Fola Esch leh SC Telstar te tan a khel kual a.

Hemi hnu hian Netherlands club Telstar, Moldova club Sheriff Tiraspopl leh Japan club Jubilo Iwata tan te a khel kual leh a, kum 2019 khan Europe club langsar Dynamo Kiev a zawm. Tunah hian Turkish club MKE Ankaragucu-ah loan-in a khel mek.

Rodrigues hi 6ft 2in-a sang a ni a, Portugal-a piang ni mah se Luxembourg tana khelh a thlang. Tun ṭum World Cup qualifying inkhel pawimawh pahnihah goal a khung ve ve avangin Gerson Rodrigues belhchian tum an tam sawt ang.

Portugal nge nge
Portugal-in goal an chhuah hnuah an nawr na sawt a, Bernardo Silva ball pet ṭha zet chu keeper Anthony Moris-a'n a dang. Renato Sanchez-a'n box pawn aṭangin crossbar a pet per a, Ronaldo-a'n hnai tak aṭangin a head over luah bawk.

Amaherawhchu Luxembourg tan inven sen a ni lo a, Neto cross chu Liverpool forward Diogo Jota-a'n injury time-ah chiang zetin a tauh goal.

Second half-ah Ronaldo a rawn inlar a, Juventus forward hian Joao Cancelo a pek hnuah box chhungah a tlanlut nghal. Manchester City wing back Cancelo hian ṭha zeta cross zuiin minute 50-naah Ronaldo-a'n goal a khung.

Portugal tan defensive midfielder Joao Palhinha-a'n minute 80-naah chak nemnghehna goal a khung a, goal dang hmuh tur a awm tawh lo. Minute 86-naah Maxime Chanot chu hnawhchhuah a ni a, Luxembourg-in player 10-in an khel tluan.

Ronaldo leh record
Ronaldo-a'n Portugal tan goal 103 a khung tawh a, Ali Daei record nihrual turin goal ruk a la mamawh a, record siam turin goal sarih a la ngai. Ronaldo hi kum 36 mi a ni tawh a, hliamin a tlak buak theih ve bawk avangin record hi khum loh theih a ni.

Portugal hi Euro C'hsip-ah champion lai ni mah se group F-ah Hungary, France leh Germany te nen an awm ho. Ronaldo hian Hungary lakah goal li a khung tawh a, France leh Germany lakah goal a la khung lo. Portugal hian Euro hma hian friendly match-ah Spain leh Israel te an hmachhawn dawn a, Euro C'ship an thlen thui bawk chuan Ronaldo tan record siam turin hun rei nghah a ngai lo thei bawk.

Ronaldo hian kum 2004 aṭang khan ram tan kum tinin goal a la khung ziah. Juventus forward hian ram tan goal a khung ringawt lo a, team a ti ṭha tel bawk. Portugal-in Ronaldo awm hma khan World Cup vawi 17 khelh theihah vawi thum chauh an khel a, Euro vawi 11 khelh theihah vawi thum chauh khelin nomawi an chawi lo.

Ronaldo awm hnuah erawh Portugal-in World Cup leh Euro vawi li khelh theihah an la khel vek a, nomawi lian tham pahnih Euro C'ship leh Nations League an chawi tawh bawk. Manchester United leh Real Madrid forward hlui Ronaldo hi Serbia nen an inkhelh ṭumin a goal khung pawmsak a ni lo a, a captain armband paihin a thinrim hle.

Portugal coach Fernando Santos chuan, "Armband a hre reng ang. Amah hi ram pum entawn a ni. Chutihrualin a khelhpui, manager leh association pawi chu sawi se a chungchang kan ngaihtuah ang. Chutiang chu ti a lo a, amah anga chak duhna thinlung nei hi an awm lo," tiin Ronaldo a chhan a, hei hian ram tana pawimawhzia a sawi lang chiang hle.