Liverpool-in centre-back an zawng

Premier League-a beisei phak lo Liverpool-in season tharah hliam vanga buai nawn an tum tawh lo a, season tawp hma hauhin transfer-ah thawm an nei lian hle.

Liverpool hi RB Leipzig defender Ibrahima Konate nen sawizawm mek an ni a, khawthlang media-ten an tarlan dan chuan Konate hian Anfield-ah medical a paltlang thlap tawh!

Reds hian tun season-ah hliam vangin defender Virgil van Dijk, Joe Gomez leh Joel Matip-te chu hun tam zawk an hmang thei lo a, centre back lamin an lung a len hmasa ber hi a mak lo.

Tu nge Konate?
Kum 21 mi defender hian RB Leipzig tan a khel mek a, German club tan tun season bik inelna hrang hrangah match 15-a khel tawh a, khawthlang media-te chuan a contract-ah pound maktaduai 34-a lei theih a nih thu a inziak tel niin an tarlang.

France Under 21 international hi Euro Under 21 inelna hmachhawnin ram tan a feh chhuak a, kum lamah la nau mah se tawnhriat a neih tam tawh avangin Reds tan defender ṭangkai tak a ni thei ang.

Leipzig hi Champions League last 16 aṭangin Liverpool-in an pet chhuak a, inkhel pahnih belhkhawmah Reds hian 4-0 in hnehna an chang - he inkhel pahnihah hian Konate chu bench-ah a awm ve ve.

Panga maw?
Khawthlang media-ten an tarlan dan chuan Liverpool hian centre back atana an duh zual panga an siam a, an zinga pakhat tal hi lakluh an tum.

Konate bakah hian Brighton & Hove Albion defender Ben White, Leicester City defender Caglar Soyuncu, loan-a an hawh mek Schalke defender Ozan Kabak leh Marseille defender Duje Caleta-Car-te chu lakluh an duh an ni.

Kum 23 mi Ben White hian Brighton tan tun season-ah match 31 a khel tawh a, Foxes tana kum 24 mi Soyuncu ṭangkaizia hrilh nawn kan ngai lo a, kum 24 mi Caleta-Car hi Croatia tana vawi 12 inlan tawh niin French football-ah chuan hriat a hlawh tawh hle bawk.

Kabak engtin?
Liverpool-ah Kabak a awm sa avangin a hming lo lang ve hi mak ti an awm mai thei a, mahse, kum 21 mi defender hian season tawp thleng loan-a khel tur bakin Reds-ah hian contract a nei lo.

Schalke 04 defender Kabak hi Liverpool-in an lalut duh a nih chuan pound maktaduai 18-in a nghetin an lalut thei dawn a, a khelh ṭhat dan a zirin a man pek belh a ngai bawk ang.

Hetihrual hian khawthlang media-te chuan Liverpool hian centre back dang an lei a nih pawhin Kabak hi chu lei tel an tum tho niin an tarlang a, Turkish defender hian Reds tana match sarih a khelh tawhah mit a la tlung rih hle.

Thawm dang
Liverpool hi pound maktaduai 42 man Napoli defender Kalidou Koulibaly nen sawizawm an ni bawk a, hei erawh Konate leh Kabak an lalut a nih chuan a thlen kher a rinawm loh thung.

Reds hian an dam ṭhat phawt chuan Virgil van Dijk leh Joe Gomez rintlakzia an hre tawh a, player pahnih hi Jurgen Klopp-a duhdan 'high defensive line' thiamsa an nih bawk avangin defender dang hi chu 'invenna' tur ang chauh an ni ang.

Hetihlai hian Juventus chuan Lyon midfielder Houssem Aouar lakluh an duh avangin Aaron Ramsey chhuahtir an pawi ti lo nia sawi a awm a, Wales international hi Liverpool nen sawizawm mek a ni bawk.

Suarez a kir dawn?
Tun hnaia Liverpool fan-te tiphur em em tu chu Luis Suarez-a kir leh dawn anga sawi thawm a awm hi a ni - khawthlang media-te chuan Suarez hian Atletico Madrid nen an inremnaah a duh chuan a thlawna a chhuah theih tur thu a ziak tel niin an tarlang.

Kum 34 mi striker hi a kum tam tawh mah se a thiam a la theihnghilh lo a, tun season-ah Atletico tan league match 25 khelin goal 19 ngawt a khung tawh - a nep lo hle.

Chutihrual chuan Atletico hian Suarez an chhuahtir dawn a nih chuan Roberto Firmino lak ve an duh dawn niin sawi a ni bawk a, Reds fans tam tak chuan Firmino chan phahna a nih dawn ai chuan Suarez lakluh hi an châk lo ang.

Liverpool & hmabak
Premier League-ah Liverpool an champion nawn dawn lo tih a chiang tawh a, match 29 an khelh tawhah pasarihna ni mekin season thara Champions League khelh leh khelh loh chu an thupui ber a ni rih.

Liverpool hian April 3 zanah league match khel turin Arsenal an lenchilh dawn a, Champions League quarterfinal first leg khel turin April 6 zanah Real Madrid an lenchilh zui ang.

Reds tan karleh inkhel pahnih hi an season khar dan tur hril theitu thui tak a ni dawn a, tun season an khar dan hian an player lak dan thlengin nghawng thui tak a nei ang tih chu thil chiang sa a ni.