Seville khawpuiah Chelsea inkhelh ngai

Chelsea chuan Champions League quarterfinal chu Seville khawpuiah an khelh a ngai dawn a, an khingpui tur Porto mualah an zin thei dawn lo.

Covid-19 vangin Portugal sorkar chuan United Kingdom ram chhung aṭanga thlawhtheihna thlawh luh a phal lo a, UK aṭanga an rama lut reng reng chu ni 14 tal an inkhunghran a ngai bawk.

Hetiang boruak karah Chelsea tan Porto muala zin theih a ni dawn lo a, hei vang hian Blues tan Stamford Bridge-a khelh bik a rem lo - quarterfinal match hnih chu Sevilla stadium Ramon Sanchez Pizjuan Stadium-ah khelh a ngai dawn ta a ni.

Team pahnih hi April 7 leh 13-a inkhel tura tih an ni a, an inkhelhna hmun sawn mah se a hun erawh sawn a ni dawn lo.

UEFA chuan thuchhuah siamin, "FC Porto, Chelsea, Portuguese Football Federation, Football Association leh Royal Spanish Football Federation-te min thawhpuinaah lawmthu kan sawi a, Sevilla FC-in inhuam taka min puih avang leh stadium hman an phal avangin kan lawm em em bawk," tiin an sawi.

Chelsea hian April 7 zana Porto an hmachhawn hmain April 3 zanah league match an khel leh phawt dawn a, tlak hlau West Brom an mikhual ang.