Belarus lakah Belgium an hrang Wales chakna Daniel James

Thawhlehni zan World Cup qualifying inkhelah Belgium chuan Belarus an nghaisa, player ṭha ṭhenkhat hahchawlhtir chungin an mikhual team hi 8-0 ngawtin an sawp thei tho a ni.

Group E inkhel dangah Wales chuan Manchester United forward Daniel James goal khat hmangin Czech Republic 1-0 in an hneh a, qualifying match an khelh hmasak zawkah chak lo mah se an insiamṭha.

Belgium an ṭha
Belgium manager Roberto Martinez-a'n ball sem thiam Kevin de Bruyne leh striker palian Romelu Lukaku te chu bench lamah hahchawlhna hun a pe, Eden Hazard a inhliam bawk; tlarhma lama a player pawimawh pahnih tel lo pawhin goal khung kawngah an buai chuang lo.

Hans Vanaken leh Leandro Trossard ten goal hnih ve ve an khung a, Michy Batshuayi, Jeremy Doku, Dennis Praet leh Christian Benteke te chuan a khat mawi tawkin goal khat ṭheuh an inkhung chhawk bawk - Belarus an zawr a ni ber mai.

Martinez-a naute hian match thum an khelh aṭangin point sarih an hmu, group E table hmahruaitu niin pahnihna Czech Republic aiin point thumin an sang zawk - match khelh hmabak la nei nual mah se Belgium hi an tlang ngei a rinawm.

Player tam a ngai
Covid-19 vangin player inlan thei lo leh harsatna nei an awm ṭhin. England coach Gareth Southgate leh Italy enkawltu Roberto Mancini te chuan squad-a player awm thei zat chu 23 aṭanga 26-a tih pun an duh thu an sawi tawh - Martinez pawh squad tih chhah duhtu zinga mi a ni ve bawk.

Martinez chuan, "Royal Belgian Football Association (KBVB) chuan squad player tih pun hi a duh, kei ngei pawhin mimal tak pawhin ka thlawp. Tunlai boruak dinhmun a zirin thil tih danglam ngai a awm ṭhin, chung zingah chuan substitution siam tam theih pawh ka duh.

"Hrileng hian eng chena rei nge min tihbuai dawn kan la hre lo, ram ṭhenkhat chuan buaina an tawk nasa. Vanneihthlak takin keini hian kan tuar nasa rih lo hlauh, amaherawhchu nakin lawkah buai thei kan ni ve tho," tiin a sawi.

Wales chakna James
Hun tawp hma minute kua chauh awm tawhah James-a'n Gareth Bale siamsak a tauh lut a, an mualah Wales chuan an mikhual Czech Republic an hneh a, match hnih aṭanga point thum hmuin table-ah pathumna dinhmun an luah.

Mikhual Czech lamin ball an chang hnem, mahse Jakub Jankto-a'n a hun ṭha neih a khawhral zel a, chawlhlawk hnu lawkah striker Patrik Schick chu hnawh chhuah a ni bawk. Wales lamin an tam zawkna an chhawr ṭangkai mai bik lo; minute 77-ah Connor Roberts hnawhchhuah a ni ve bawk.

Goal awm loin team pahnih an inhnehtawk dawn nia a lan hnuah Wales an vannei ta zawk. Goal khung theihna ramchang a hlah nual hnuin Bale-a'n James tan a siamsak a, ram tan match a khelh hnuhnung 19 aṭangin goal leh assist vawi sarih ve ve a nei.