Engtikah nge Indian football tan khua a var dawn?

Kum 2011 hnua a vawi khat nan kum 2019 khan AFC Asian Cup khel turin India-in an inpetkai a, kum 1964-a pahnihna dinhmun lo hauh tawhtu India tan football khua a var ṭanah tam takin an ngai.

Blue Tiger hian an match hmasa berah 4-1 ngawtin Asian rama team ṭha Thailand an sawp a, mahse, a thlengtu United Arab Emirates (2-0) leh Bahrain (1-0) ngam lo zuiin uiawm takin an tla.

Asian Cup-a India khelh danin fak a hlawh a, beiseina pawh a sang a, Indian football-a sum tam tak luantirtu Indian Super League thlengin fak a hlawh - intithei takin AIFF a hawi vel.

India coach Stephen Constantine a bang zui a, AIFF-in hming langsar lam hawiin Croatia international hlui Igor Stimac-a lalut zui - Hajduk Split leh Croatia a lo enkawl tawh bawk avangin beiseina a sang hle.

Bul ṭanna chu
Football Association of Thailand-in King's Cup inelna an buatsaiha tel turin India an sawm a, Stimac-a hna bul ṭanna a ni - a match hmasa berah Curacao an hmachhawn a, 3-1 in an tlawm nghal.

King's Cup-ah hian team pali an tel a, knockout tournament a ni - Curacao player tam zawk hi Dutch top division lama khel an ni a, India-in an ngam lo hi tumahin an dem lo.

India-in final an lut zo lo a, pathumna ni tur zawnnaah Asian Cup-a an hneh hnu Thailand chu 1-0 in an hneh nawn. Blue Tiger-in an la tisual lo.

AIFF-in Intercontinental Cup a buatsaih zui a, a manganthlak ṭan - Tajikistan(4-2), North Korea (5-2) leh Syria (1-1) lakah India a chak zo lo vek a, hetichung hian Stimac-a'n hun a la nei tam tawk lo tih hriain fan-ten dawhthei takin an thlir hram hram.

Beiseina thamral
India-in Intercontinental Cup an khelh zawh hnuah World Cup qualifier an hmachhawn leh zui a, an match hmasa berah team ṭha Oman chu 2-1 in an ngam lo a, match hnihnaah Asian champion Qatar chu khualmualah 0-0 in an inhnehtawkpui zui.

World Cup 2022 thlengtu tur, Asian football powerhouse ni chho mek lakah India-in draw result an hlawh chhuak a, khualmualah a la ni zui - media leh fan-ten India leh Stimac an fak rawn a, Indian football-in hma a sawn zel.

Mahse, beisei leh rin angin India an ropui zui lo. Kolkata khawpuiah team chhe zawk Bangladesh chu 1-1 in an inhnehtawkpui a, khualmualah Afghanistan (1-1) an inhnehtawkpui leh a, Oman lakah 1-0 in an tlawm leh bawk!

Kum 2021 a her chhuak a, Stimac-a'n India tan hmasawn tura team ṭha tum a ṭul thu a sawi a, Oman (1-1) an inhnehtawkpui hnuah UAE lakah 6-0 in an tlawm zui - media leh fan-ten an dawh thei tawh lo.

Engtin nge ni dawn?
Indian football fan-ten UAE squad an thlir a, UAE tana hmuhnawm khawpa khel chhuak Fabio Lima leh Sebastián Tagliabúe an hmu - player pahnih hi an hmel leh hming aṭang pawhin UAE mi an ni lo tih a lang.

Kum 27 mi Lima kha Brazilian a ni a, an ram club Icasa, Atlético Goianiense leh Vasco da Gama tante a lo khel tawh - kum 2014 khan UAE club Al Wasl a pan a, February 2020 khan UAE khua leh tui nihna pek a ni.

Tagliabúe kha kum 36 mi a ni a, Paraguay, Chile leh Colombia ramah te football khelin hun a lo hmang tawh a, kum 2013 khan UAE club Al-Wahda a zawm - ani pawh hi nikum khan Emirati khua leh tui nihna pek a ni a, middle-east lama goal khung thei hmingthang hian ram tan match thum khelin goal hnih a khung tawh.

UAE leh India player an inthlauh sa piahlama team pahnih danglamna chu UAE-in ram pawn player, an khua leh tui nihna nei si an chhawr thei kha a ni a, fan-ten India-in hetiang dan hi hmang ve thei se an duh hle.

A buaithlak
India leh UAE inkhelh laiin Indian football hrechiangtu, commentator lar Joe Morrison chuan, "UAE-in Sebastian an dah lut a, India erawh PIO pawh an la nei thei lo," tiin twitter lamah a ziak.

PIO hi Persons of India Origin tihna a ni a, hmun danga Indian thisen kai, ram dang khua leh tui nihna nei tihna a ni ber - mahse, heng ho hian India tana khelh an duh a nih chuan ram dang mi an nihna chu an thlah a ngai.

Chumi awmzia chu, England-a piang, Indian thisen kai player chuan India tana khelh a duh a nih chuan British khua leh tui nihna a neih kha a thlauh thlak a ngai tihna a ni a, thil harsa tak a ni.

December 2008 khan Union Sports Ministry chuan PIO leh Overseas Citizen of India (OCI) card neitu chu India tana inlan thei lo turin thutlukna a lo siam tawh.

Ta se...
Khawvel hmun dang tam zawkah chuan khua leh tui nihna neih kawp theih a nih avangin South American player pahnih pawh UAE tana inlan a harsat loh phah - khawvel hmun dangah pawh hei hi chu an uar hle.

Nikum lam khan AIFF general secretary Kushal Das chuan sports minister Kiren Rijiju, hetihlaia sports secretary Radhey Shyam Julaniya leh Sports Authority of India director general Sandip Pradhan -te a titipui tawh thu a sawi a, PIO leh OCI-te chu India tana an inlan theih dan tur ngaihtuahpui turin an ngen.

PIO player zingah India tana a khelh duh thu langsar taka ti lang tawh chu Danny Batth a ni a, England-a piang, kum 30 mi defender hi Wolverhampton Wanderers captain pawh lo ni tawh a ni a, tunah Stoke City tan Championship-ah a khel mek.

Kum 28 mi Omid Singh chu Iran-a piang leh seilian a ni a, India tana khelh a châk thu a lo sawi tawh bawk - Iranian top division club Aluminium Arak FC tan a khel mek a, a kum a la tam loh bawk avangin India tana ṭangkai thei tak tur a ni.

Rawlthar beiseiawm
PIO zingah player beiseiawm tak tak an awm nual bawk. Kum 22 mi Yan Dhanda hi Liverpool academy aṭanga inzir chhuak a ni a, Championship lamah Swansea City tan a khel mek.

England tana Under 16 leh Under 17-ah pawh lo khel tawh Dhanda hi tun hnaia a ṭawngkam ṭhenkhat aṭangin India tan inlan a hreh a rinawm lo a, UAE laka India an mualpho ṭum pawhin, "Beidawng suh u, result ṭha chu a lo la thleng em em ang," tiin twitter lamah Indian player-te a fuih.

Kum 21 mi Dinesh Gillela hi Bournemouth U21 tana khel mek a ni a, kum 19 mi winger Dilan Kumar Markanday hi Tottenham Hotspur-in rawlthar beiseiawm an neih mek zingah chhiar hmaih a ni ngai lo.

Heng kan tarlan tak player ringawt pawh hi PIO an nihna angin India tan inlan thei se chuan Asian football powerhouse-te elpha turin India hian theihna a nei nghal.

Buaina dang
PIO player zingah Aston Villa defender Neil Taylor (Wales), Pacos Ferreira forward Luther Singh (South Africa), Twente winger Luciano Narsingh (Netherlands), Bayern Munich II attacking midfielder Sarpreet Singh (New Zealand) leh Sandejford defensive midfielder Harmeet Singh (Norway)-te chu ram dang tana inlan tawh langsar an ni.

Indian thisen kai, ram pawna player-te thlen chin enin thiamna hi pianpui ai mahin zirthiam a ni tih a langchiang a, ISL leh a chhehvela sum tam tak hmangtu India tan a bul ṭhut (grassroots football) lama rilru sen thar a ngai tih a lang.

Blue Tiger-in result a neih ṭhat apiangin ISL vang nia sawi a ni ṭhin a, UAE laka an mualpho takah chuan ISL hian mawhphurhna an lak ngam tho a pawimawh - club-ten grassroots football aiin player hlawh leh a chhehvelah sum an seng hnem zawk a, ram pawn player thlengin an phu loh hlawh an la.

Chutihrual chuan ISL hi mawhchhiat bera neih erawh a thiang lo - I League hun laia player contract leh hlawh mumal lo tam tak thaibo tu kha a ni tih hriatsak ve tho tur a ni a, a tawi zawnga sawi chuan 'nakin' hun Indian football chinfel nan tun aia nasa zawka grassroots football buaipui a ngai a, 'tun' hun atan PIO player-te India tana an khelh theih dan ngaihtuah a ngai.