Kar li chawl tur Lewandowski

Bayern Munich striker Robert Lewandowski chu ram tana a zinchhuahnaah a khup a tih hliam avangin kar li chhung a chawl dawn. Lewy hian Pathianni zana Andorra 3-0 a an hneh ṭumin goal hnih a khung a, minute 63-naah hliam vangin lakchhuah a ni.

Polish FA chuan Lewy hian England a hmachhawn theih loh tur thu an sawi nghal a, a rei lo berah ni 10 a chawlh a ṭul tur thu an tichiang nghal. Bayern striker hi endik a nih hnuah kar li a chawlh a ṭul dawn a, inkhel pawimawh match ṭhahnem tak a khel thei dawn lo.

Lewy tel loin
Bavarians hian April 3, Inrinni zan hian RB Leipzig an tlawh dawn a, an inkarah point li chauh a awm avangin an inkhel tur hi a pawimawh dawn hle.

April 8, Nilaini zanah nikum Champions League final-a an hneh hnu Paris Saint-Germain chu CL quarterfinal-ah an mikhual dawn a, April 14-ah French champion hi an tlawh leh dawn. Lewy hi a tel ve thei dawn lo.

Hei chauh hi a ni lo, Union Berlin (April 10), Wolfsburg (April 16), Bayer Leverkusen (April 21) leh Mainz (April 24) a hmachhawn hunah a khelh theih a beiseiawm loh.

Record a nghawng
Lewy hian kum 2014 khan Borussia Dortmund aṭangin Bayern Munich hi a zawm a, season sarih chhungin match 16 chauh khelh loh a la nei. Poland leh Andorra inkhelh ṭuma a khup a tih hliam avangin match sarih vel khel lo thei dinhmunah a ding.

Kum 32 mi Lewandowski hi tun season-ah a che ṭha a, Bavarians tan goal 42 khung tawhin Bundesliga-ah ringawt goal 35 a khung tawh. Lewy hian season khata Gerd Muller-a goal khung record goal 40 khung turin goal nga chiah a mamawh tawh a, amaherawhchu a inhliam avangin record khum hi a harsa dawn.

Bundesliga-ah hian team 18 chauh an awm avangin match 34 chauh khelh tur a awm a, season liam ta pawh khan Lazio forward Ciro Immobile lakah European Golden Shoe chawimawina a chan. Italian forward hian match 37-ah goal 36 a khung a, Lewy hian match 31-ah goal 34 khungin goal hnihin a pha lo.

A aiawh tur
Bavarians boss Hansi Flick-a'n Lewandowski tel loa khelh a zir a ṭul dawn a, tun dinhmuna khawvel player ṭha bera sawi theih thlak hi a awlsam dawn lo.

German champion hian 4-2-3-1 formation an hmang ber a, hmatawngah Lewandowski a awm ṭhin. Lewy thlak theitu tur chu PSG aṭanga an lakluh Eric Maxim Choupo-Moting a ni ang. Germany-a piang striker hi Cameroon international a ni a, player ṭha ve tak ni mah se Lewy nen an record khaikhin chi a ni lo.

Kum 32 mi Choupo-Moting hian Bundesliga-ah goal khat chiah a la khung a, inelna dang nen pawh goal nga chiah a la khung. PSG striker hlui hi rin ngam a harsa a nih pawhin system ngai an hmang dawn a nih chuan a thlanawm ber tura ngaih a ni.

Chutihrualin khelh dan an thlak hret duh a nih chuan kawng dang a awm. Germany inkhel kan thlir chuan tlarhmaah Serge Gnabry a awm a, a sirah Leroy Sane leh Kai Havertz ten an thlawp. Gnabry leh Sane te hi Bavarians an ni a, Flick tan 4-3-3 system hman ve hi a har lo.

Bavarians-in Haverts nei lo mah se Chelsea forward aia tawnhriat nei ṭha zawk Thomas Muller an kawl a, French winger Kingsley Coman an neih bawk avangin German champion attacking a la na dawn. Amaherawhchu Lewy a inhliam miau avangin Bayern hi an ṭhat dan berin an khel thei dawn lo tih erawh a chiang a ni.