Goal sarih khung thei Netherlands

Victoria Stadium-ah Netherlands-in an theihna tak an pholang a, mualneitu Gibraltar 7-0 zetin an sawp. Oranje tan hian Memphis Depay-a'n goal hnih a khung a, Steven Berghuis, Luuk de Jong, Georginio Wijnaldum, Donyell Malen leh Donny van de Beek ten goal khat ṭheuh an khung bawk.

Group G inkhel dangah mak takin Latvia-in Turkey an chelh a, 3-3 in an inhnehtawk. Norway-in khualmualah Montenegro 1-0 in an hneh a, goal awmchhun hi Alexander Sorloth-a'n a khung.

Hei le, Oranje
Netherlands-in Turkey an hneh loh hnuah Latvia 2-0 in an hneh a, Steven Berghuis leh Luuk de Jong ten goal khat ve ve an khung. Frank de Boer-a'n Gibraltar an hmachhawn hmain goal nga tal khung an mamawh thu a sawi a, Latvia nen an inkhelh hma bul ṭantute bawk a thlang.

Mikhualna ramah Neterhlands-in goal an khung thei lawk lo a, minute 41-naah Steven Berghuis hmangin goal hmahruai an khung chauh. First half-ah goal khat chauh a lut a, second half-ah PSV right back Denzel Dumfries aiah Ajax midfielder Ryan Gravenberch a rawn lut. Daley Blind a inhliam nat avangin centre back aiah PSV forward Donyell Malen a rawn lut a, Oranje-in goal khung an tum hle.

Second half-ah a khat mawi tawkin goal an khung a, minute 55-naah Luuk de Jong-a'n rawn khung leh ṭanin player dangin an rawn khung belh zel. Manchester United forward hlui Memphis Depay-a'n goal hnih a khung a; Liverpool midfielder Wijnaldum, PSV forward Malen leh Manchester United midfielder Van de Beek ten goal khat ṭheuh an khung.

Inkhel dang
Turkey-in World Cup qualifier bul ṭan nan Netherlands 4-2 in an hneh a, Norway 3-0 in sawp leh mah se Latvia lakah point khat chauh an hmu. Ataturk Olympic Stadium-ah Turkey-in minute hnihna lekah Kenan Karaman hmangin hma an hruai a, Hakan Calhanoglu hmangin minute 33-naah an khung belh.

Turkey dinhmun ṭha hman mah se Robert Savalnieks-a'n Latvia tan a khung a, halftime-ah 2-1 a ni. Second half-ah Burak Yilmaz-a'n minute 52-naah penalty a khung a, Turkey-in goal hniha hma an hruai nawn hnuah an chesual. Latvia tan Roberts Uldrikis (58') leh Davis Ikaunieks (79') ten an khung a, siphurh an sut zo.

Norway-in Stadion Pod Goricom-ah Montenegro 1-0 in an hneh a, Alexander Sorloth-a'n minute 35-naah goal awmchhun a khung. Borussia Dortmund forward Erling Haaland-a'n minute 80 zet khel mah se goal a khung lo. Norwegian striker Haaland hian tun ṭuma World Cup qualifying match thumah hian goal khatmah a khung lo a ni.