Semifinal-ah Barty a lut

Miami Open khelh laiah Ashleigh Barty chuan nimin khan a khingpui Aryna Sabalenka hnehin semifinal a inhlangkai a, world number 1 hian final lut tur chuan seeded pangana Elina Svitolina a paltlang leh a ngai ang.

Grandstand, Florida a inkhelah seeded pakhatna Barty hian Belarus nula lakah hian 6-4, 6-7 (5), 6-3 in hnehna a chang, semifinal lama a hmachhawn tur Svitolina hian Anastasija Sevastova 6-3, 6-2 in a lo hneh ve bawk.

Australian star Barty hian 2019 khan Miami Open nomawi hi a chawi a, nikum khan hri leng vangin tournament hi an nei lo; kuminah nei leh chauhin champion lai hian hnehna a chang zel; Florida a inelna neihah hian a zawnin match 10 a chak ta.

Kum 24 mi Barty chuan, "Hun rei tak hnuah ka khelh ṭhat leh ber ṭum a ni hial ang, tennis bakah hri leng kan ngaihtuah tel avangin rilru a khingbai deuh ṭhin, tunah chuan zawimuangin ngai ka awh chho ve leh mek.

"Ka sawi tawh ang khan Australia aṭanga Florida pan kha a namai lo hle, khawvel pang lehlamah inkhel tura kan zin chhuak a nih chuan engpawh kan tawh huam a ngai, tunah hian kum tluana mahni in lum kalasan huamin inelna ka hmachhawn," a ti.

Nizan khan quarterfinal inkhel dangah Naomi Osaka leh Bianca Andreescu te an inlan a, champion beisei zinga mi pahnih hi an result kan hre lo. Japanese nula leh Canadian star hian Maria Sakkari leh Sara Sorribes te an hmachhawn leh ang.