Japan-in goal an surtir

Japan ram chuan football huang chhunga an chak chian ber dawttu an tawng. Asian team ṭha hian Thawhlehni zan World Cup qualifying inkhelah Mongolia chu 14-0 tehmeuh in an luhchhuah.

Kum 1967 khan Japan hian Philippines chu 15-0 in an lo sawp tawh a, hemi tih lohah chuan tum ṭum hi an chak chian ber ṭum a ni. A zawna a vawi sarih nan World Cup khelh leh ngei an beisei chhunzawm bawk.

Covid-19 vangin khawvel football-in buaina a tawk a, 2019 November thla hnua a vawi khat nan Japan pawh hian match an nei thei ve leh chauh - hun rei tak hnuah pawh an thiam an la theihnghilh chuang lo, world number 190 Mongolia chu a tuartu an ni.

Fukuda Denshi Arena a inkhelah hian hri leng vangin a hmuna entu an awm thei chuang lo a, mipui awm lo mahse Japan phurna a nep chuang lo, chumi letling chiah chan mualneitu Mongolia lamin auphurtu an nei lo thung.

Japan tan hian Yuya Osako chuan hattrick a siam, Sho Inagaki, Junya Ito leh Kyogo Furushashi ten goal hnih ṭheuh an khung bakah, Takumi Minamino, Daichi Kamanda, Hidesmasa Morita leh Takuma Asano ten goal khat ṭheuh an neih bakah Khash-Erdene Tuyaa chuan anmahni lamah a ti lut bawk.

Samurai Blue manager Hajime Moriyasu chuan, "Ka naute kha inkhelh an chakin chak duhin an tuihal em em a, a rah chhuah chu a takin kan hmu a ni. Inkhelh laklawh laiin game kalphung kan thlak a, chumi chung pawh chuan buaina kan tawk lo," tiin a sawi.

Japan hian an match lehpek atan chuan June 3 hian Myanmar an hmachhawn leh ang.