Miami Heat tan Dwyane Wade

Dwyane Wade chuan Miami Heat tana an khelmual bika a match hnuhnung ber chu nimin zing khan a khel a, point 30 score in a team hi Philadelphia 76ers lakah 122-99 in hnehna a chanpui.

Kum 37 mi Wade hian tun season tawpah basketball chawlhsan a tum a, a team hi Eastern Conference-ah 10-na nih puiin playoff an khel dawn lo. Playoff an khelh dawn loh avang hian tukin zing dar 5:30-a Brooklyn Nets nen an inkhelh tur chu a match hnuhnung a ni tawh ang.

American star Wade chuan, "Fans lamin min duhsakna chi hrang hrang an lantir kha ka tan chuan a hlu lutuk. Player leh coaching staff thlengin duhsakna ka dawng hnem a, ka tan chuan hei aia ropui a awm thei tawh chuang lo. He hmun hi ka tan chuan kumkhua ka in a ni tawh ang," tiin a sawi.