King's Cup-ah India inlan dawn

All India Football Federation chuan Thailand-a neih tur King's Cup-ah Indian football team an inlan dawn tih an tichiang a, he invitational tournament-ah hian India leh inelna thlengtu Thailand bakah Vietnam leh Curacao an inlan bawk ang.

Football Association of Thailand chuan kum 1968 aṭang khan he inelna hi a lo huaihawt tawh ṭhin a, FIFA hriatpuina hnuaia international 'A' tournament niin kum 1977 khan India hi an lo inlan tawh.

Blue Tigers hian kum 2001 khan Kuala Lumpur-ah Merdeka Tour­nament an khel a, kum 18 hnuah FIFA ranking tournament an khel leh dawn ta a ni.

AIFF general secretary Kushal Das chuan, "May thla laihawlah chuan coach thar kan nei hman tawh dawn a, September-ah FIFA 2022 World Cup Qualifiers kan khelh dawn bawk avangin King's Cup hi kan tan chuan inbuatsaihna ṭha tak a ni ang," tiin a sawi.

Inelna hi knockout tournament a ni a, team pali hian June 5-ah match khelin hnehna chang pa­hnihin final an khel ang.