Super Kings hmaah KKR an zuai

Chennai Super Kings chuan Indian Premier League table chung ber luah turin Thawhlehni zan khan Kolkata Knight Riders chu wicket sarihin an hneh a, over li a vawma wicket thum latu Deepak Chahar chu CSK tan chakna hnar a ni.

Chennai khawpuia inkhelah mikhual team KKR an bat hmasa zawk a, opener Chris Lynn chu run pawh siam loa a out nghal avangin beisei a bo hle - over 10.1-ah wicket ruk an hloh fel der tawh a, run 47 chiah an siam!

Kolkata club mualpho lutuk tur venhim nan Andre Russell chuan run 50 siamin a tawp thleng a rawn dam a, batsman dang zingah run 20 vaw kai thei an awm lo!

KKR hian over 20-ah run 108 an tlin hram a, wicket kua an hloh - CSK tan target huphurhawm a ni lo a, chak chiang saa an indah a nih pawhin a awm lo hran lo ang.

CSK hian an beisei anga awl­samin um pha lawk lo mah se over 17.2-ah an target hi an um pha fel der a, run 111 siamin wicket thum chiah an hloh.

Chennai club tan Faf du Plessis chu fak phu a ni a, kum 34 mi South African batsman hian a tawnhriat neih ngah chhawr ṭangkaiin run 43 a rawn siam a, a tawp thleng a dam.