Man City ngamtu Tottenham
Tottenham Hotspur-in Manchester City chu an mual tharah Son Heung-min goal hmangin 1-0 in an hneh. Thawhlehni zan Champions league quarterfinal first leg result hian midang chunga lenga ngaih Pep Guardiola kaihhruai team chu hneh theih an ni tih a pholang.
Second leg hi April 17, Nilaini zanah Etihad Stadium-ah khelh a ni dawn. City khelmualah bawk hian ni thum hnuah English club ṭha pahnih hi Premier League-ah an inhmachhawn zui ang.
Quadruple an thlir?
Manchester City manager Pep Guardiola-a'n nomawi pali chawi chu thil theih loh a nih thu sawi mah se an player rem dan enin quadruple a beisei tih a lang.
City hian April thla chhungin kartin match hnih an nei a, an khelh tur chauh ni loin an khelh leh tur thlirin telin player a rem. First leg-ah match thum chhung inkhel bul ṭan tawh Kevin De Bruyne chu a hahdamtir a, left back pahnih Benjamin Mendy leh Oleksandr Zinchenko aiah Fabian Delph a thlang.
Chutihrualin a striker neih hriam ber Sergio Aguero chu bul ṭan turin a dam tawh a, KDB aia lut pawh Fernandinho te an nih tho avangin an squad chhah zia a lang.
A hunah tak Lloris
Tottenham an ṭhat dan berin an inrem a, chutihrualin keeper rinrawl Hugo Lloris erawh tihsual zeuh a chin avangin league-ah point an hloh phal nual tawh a, thu uar deuh phei chuan Spurs tana khel tlak a ni lo tih thlengin an sawi tawh.
France number 1 keeper Lloris hian Liverpool an hmachhawn ṭumin a tihsual vangin an chak lo a, Champions Legue-ah pawh PSV Eindhoven leh Barcelona an hmachhawn ṭumin a chesual ve ve. World Cup final-ah pawh Croatia laka an goal chhuah chu a tihsual tho a ni a, rin ngam a har tawh.
Amaherawhchu minute 10-na lekah Danny Rose chu box chhungah a handball a, VAR hman a nih hnuah City-in penalty an hmu. Lloris chuan a thiamthil pholanna hun remchangah hmangin Sergio Aguero penalty a dang. French keeper hian 2019-ah penalty a hmachhawn a la dang vek a, Argentine forward hma hian Jamie Vardy leh Pierre-Emerick Aubameyang pet a dang tawh bawk.
Spurs an phur ta
Tottenham boruak a nung a, Man City-in an tih ṭhin danin ball chang tam mah se Spurs goal bawh a na zawk. Minute 58-naah inhliam vanga Harry Kane lakchhuah a ṭul chungin London club-in beiseina an nei chhunzawm a, a tawpah South Korean forward Son-a'n hming ṭhat nan a hmang.
Son Heung-min hian box chhungah City keeper Ederson lak hmain ball a la a, talbuai duh loin pet theihna tur khawp a insiam a, Fabian Delph-a'n a hnaih chilh loh bawk avangin minute 78-naah chakna goal a khung.
Asian tlangval hian Crystal Palace an hmachhawn ṭumin Tottenham stadium thara goal hmasa ber a khung a, Champions League-a goal hmasa ber a khung leh bawk avangin Son-a hian Spurs history-ah hmun pawimawh a chang ang.
A la zo lo
Tottenham manager Mauricio Pochettino chuan, "Kan khel ṭha takzet. Chutihrualin kan khingpui hi Manchester City an ni a, second leg a la awm bawk avangin semifinal kan la lut lo. Minute 90 dang khelh tur a la awm," tiin a ṭawng fimkhur hle.
Manchester City manager Pep Guardiola chuan, "Champions League a ni a, engpawh thleng thei a ni. Kan khel ṭha thawkhat a, inkhel pawh kan thunun. Penalty kan hlah a, kan inkhelh leh hunah chuan goal kan khung tawh ang. Crystal Palace nena inkhel turin kan inpuahchah a ṭul a, Tottenham kan ngaihtuah hman tawh lo," tiin a sawi.